شەفەق نیوز/ وەزارەت کارەبای عراق، ئمڕوو دووشەممە، ئاشکرای ئامادەیی خوەی کرد ئەرا وەرز تاوسان وە پلانەیل پڕەوکردن شوین کەمەوبوین گاز ئیران دویای بڕیار دۆناڵد ترەمپ سەرۆک ئەمریکا وە هەڵوەشانن وەخشین هاوردەی گاز ئیران ئەرا عراق.
ئەحمەد عیبادی قسەکەر وەزارەتەگە ئەرا ئاژانس شەفەق نیوز وت: لەدەسچگن گاز هاوردە لە ئیران ئەوەسا کاریگەری گەورەیگ لەبان سیستەم کارەبا لە عراقروس کەێد، کە زیاتر لە 8000 ميگاوات لەدەس چوود، وەلێ حکومەت و وەزارەت کارەبا پلانیگ گشتگیر دانانە ئەرا مسۆگەرکردن نەهاتن قەیرانیگ لە بەشەوکردن وزە لە وەرز تاوسان.
عیبادی دیاری کرد کە پلانەگە چەکانن کەڵافەبوین، و دروسکردن ویستگەیل نوویگ هاناوی، هەمیش پشتبەسین فەرمانگەیل حکومەتی وە سیستەم وزەی خوەر، کە قۆناغ یەکەم ئامادەکردن زیاتر لە 540 بینای حکومەتی گرێدەو، کە وەرجە تاوسان یەک لە سێ بەشی تەواو کریەێد.
وتیش: وەزارەت نەفتیش نزیکەی 600 مليۆن پای شەشپاڵوو لە گاز شل لەڕی سەکووەیلیگ لە بەندەرەیل عراق هاوردە کەێد، کە وەرجە تاوسان هاتگ تەواو کریەن، کە نزیکەی 4000 میگاوات لە کارەبا دابین کەێد، وتیش: وەگەرد وەردەوامی کار وەگورەی رێککەفتن وەرد تورکمانستان ئەرا هاوردەی گاز جویر جیگریگ ئەرا گاز ئیرانی.
لەباوەت گریەداین کارەبا وەرد دەوڵەتەیل خەلیج، عیبادی دیاری کرد کە پڕۆسەی گریەداین هەلیجی وە وزەیگ تا 500 میگاوات وەرجە حوزەیران ئایندە جیوەجی کریەێد، وەگەرد قایمکردن گریەداین کارەبا وەرد ئوردن و تورکیا، ئەرا زیایکردن توانای بەرهەم.
وتیش: حکومەت و وەزارەت کارەبا تەقەلای کەورەیگ کەن ئەرا مسۆگەرکردن ئارامی وزە، لەناویان پاڵپشتیکردن هەڵمەت بانک ناوەندی عراق مە قەرز وە مەردم دەێد تا سیستەم وزەی خوەر لەناو ماڵەیل بنەن، کە دەسمیەتی دەێد لە کەمەوکردن زوور وەبان تووڕ نیشتمانی.