شەفەق نیوز/ نەبیل مەرسومی پسپۆڕ ئابووری، ئمڕوو یەکشەممە، دووپات کرد کە راسی کارەبای عراق لە ماوەی تاوسان هاتگ پیشکەفتن وەرچەویگ نەیرێد، هەرچەن ئەو دڵنیاییە کە وەزارەت تەقەلا دەێد بخەێدە بازاڕ رای گشتی.
مەرسومی، لە پۆستبگ لە پەیج تایبەتی خوەی لە تووڕ کۆمەڵایەتی فەیسبووک، کە ئاژانس شەفەق نیوز نووڕیەی، راگەیان کە “بەرهەمهاوردن ئیسەی غاز نیشتمانی نیەتوەنێد بوودە جینشین غازی ئیران لە، کە رەسین وەی کارە چەن ساڵیگ پەرەپیدان و بەرهەمهاوردن خوازێد”، جویر “پڕۆژەیل وزەی خۆر، کە مەزەنە کریەێد بەشداربوون لە بەرزکردن ئاست بەرهەم کارەبا، ئەرا ماوەی کەمتر لە سێ ساڵ وەگورەی خاسترین مەزەنە تەواو نیەوون”.
لەباوت چارەسەر جیگر، مەرسومی وت: "وە کراگردن سەکووەیل لە خۆر زوبیر و دانانی لە ساڵیگ کەمتر نییە، لە وەختیگ دروسکردن سەکوو جیگر لە بەندەر فاو زیاتر لە دوو ساڵ وەپی چوود."
وتیش: "پڕۆژەیل پەیوەندیی کارەبایی وەرد وڵاتەیل هاوسا بەشداری نیەکەن لە خاسترکردن رەوس کارەبا لەماوەی ئمساڵ، چوینکە گریەداین وەرد سعودیە سێ ساڵ خوازێد، لە وەختیگ گریەداین وەرد کوێت وە توانای 500 مێگاوات وە ئەگەریگ فرە لەماوەی ساڵ 2025 تەواو نیەوود.
لەباوەت دووقاتکردن هاوردەکردن کارەبا لە تورکیا لە 300 ئەرا 600 مێگاوات، یەیش وەدەسهاوردن ڕەزامەنی یەکێتی ئەوروپا خوازێد، یەیش چانسەگەی لەی وەختە نادیارە”.
وەرجەیە، زیاد عەلی فازڵ، وەزیر کارەبای عراق، لە دیداریگ وەرد وەزیر وزەی تورکیا ئالپ ئەرسلان بایراکتەر لە بەغدا، وە ئامادەبوین ئەنیل بۆرا ئینان باڵیۆز تورکیا، دووپات کرد کە “وەزارەت کارەبا گشت ئامادەکارییەیلی تەواوکردگە ئەرا بەرزکردن توانای دابینکردن کارەبا لە گشت کڕەیل پەیوەندی عراق و تورکیا ئەرا 600 مێگاوات، پێشنیار دروسکردن دەسەیگ هاوبەشی باڵاتر تەکنیکی کرد ئەرا وەشوینکەفتن جیوەجیکردن ڕێککەفتنەیل”.
جی باسە کە ئیدارەی دۆناڵد ترەمپ سەرۆک ئەمریکا ئەو وەخشینە هەڵوەشانەو کە ری وە عراق دیاد پویل وە ئیران بەێد لە وەرانوەر کارەبا، یەیش لە چوارچیوەی هەڵمەت "فرەترین فشار" کە ئیدارەی ئیسەی ئەمریکا دژ تاران جیوەجی کەێد.