44 ساڵ به‌رله ئه‌مڕۆ شۆڕشی گوڵان به سه‌ركردایه‌تیی پارتی دیموكراتی كوردستان هه‌ڵگیرسا كه درێژكراوه‌ی شۆڕشی مه‌زنی ئه‌یلوول بوو. به وره‌یه‌كی به‌هێزی بڕوابه‌خۆبوون و بڕوایه‌كی پته‌وی نیشتمانپه‌وه‌رانه و ڕوانگه‌یه‌كی نوێی شۆڕشگێڕانه‌وه، به‌رده‌وامیی به تێكۆشانی گه‌له‌مان به‌خشی. یادكردنه‌وه‌ى شۆڕشی گوڵان ڕێزلێنانه له خه‌باتی گه‌ل و تێكۆشان و ماندووبونی پیشمه‌رگه قاره‌مانه‌كانمان و ده‌ربڕینی ستایش و ئه‌مه‌كدارییه بۆ خوێنی پاكى شه‌هیدان و خانه‌واده سه‌ربه‌رزه‌كانیان.
یادى شۆڕشی گوڵان كه كۆكه‌ره‌وه‌ی هێزه نیشتیمانییه‌كان و ئه‌زموونێكی سه‌ركه‌وتووى كار و خه‌باتی پێكه‌وه‌ییی لایه‌نه كوردستانییه‌كانه و به‌ره‌ى كوردستانى لێوه دروست بوو، ده‌بێت هانده‌رێكی به‌هێز بێت بۆ هه‌میشه نوێبوونه‌وه و هێنانه‌كایه‌ی ڕوانگه‌ی نوێ له شێوازی خه‌بات و تێكۆشانی نیشتمانیانه‌ماندا. متمانه‌ی كوردستانیان به په‌یام و ئامانجه‌كانی شۆڕش، پشتیوانییه‌كی گه‌وره بوو بۆ گه‌شه‌سه‌ندن و به‌هێزبوونی له ماوه‌یه‌كی كورتدا به ئیراده‌یه‌كی پۆڵایینه‌وه.
ئه‌مڕۆ كاتێك یادى شۆڕشى گوڵان ده‌كه‌ینه‌وه، له‌پێشترین ئه‌رك و به‌رپرسیاریه‌تیی هه‌موو لایه‌ن و پێكهاته كوردستانییه‌كان، كاركردنی به‌رده‌وامه بۆ پته‌وكردنی یه‌كڕیزی و متمانه و گیانی لێبورده‌یی و یه‌كترقبووڵكردن و بڕوابوون به بنه‌مای كاری پێكه‌وه‌یی بۆ زاڵبوون به‌سه‌ر هه‌موو ئه‌و ئاسته‌نگ و قه‌یرانانه‌دا كه ڕووبه‌ڕوومان ده‌بنه‌وه، هه‌روه‌ها بۆ پاراستنی ده‌ستكه‌وته‌كانی خه‌بات و قوربانیدانی گه‌له‌كه‌مان و مسۆگه‌ركردنی ئاینده‌یه‌كی گه‌شتر.
به‌رز و پیرۆز بێت (44)ـه‌مین ساڵیادی شۆڕشی گوڵان. سڵاو له خه‌بات و ماندووبووونی پیشمه‌رگه و تێكۆشه‌ره قاره‌مانه‌كانی شۆڕش و گیانی خۆڕاگریی گه‌له‌كه‌مان. دروود بۆ گیانی پاكی شه‌هیدانی شۆڕشی گوڵان و سه‌رجه‌م شه‌هیدانی كوردستان.
نێچیرڤان بارزانی
جێگری سه‌رۆكی پارتی دیموكراتی كوردستان