شاندی حکوومەتی هه‌رێمی كوردستان دوو مه‌له‌ف له‌گه‌ڵ به‌غدا یه‌كلایی ده‌كاته‌وه
به‌غدا-KDP.info- سه‌رۆكی نوێنه‌رایه‌تیی حکوومەتی هه‌رێمی كوردستان له به‌غدا گوتی، بڕیاره ڕۆژی شه‌ممه‌ی داهاتوو ده‌نگ له‌سه‌ر ته‌واوكردنی كابینه‌ی نوێی حکوومەتی عێراق بدرێت و دواتر شاندی حکوومەتی هه‌رێمی كوردستان دێته به‌غدا و دوو مه‌له‌ف له‌گه‌ڵ به‌غدا یه‌كلایی ده‌كاته‌وه. ئه‌وانیش دارایی و ئه‌وه‌ی دیكه‌ش نه‌وت، چونكه تا ئێستا وه‌زیری نه‌وت نییه، بۆیه چاوه‌ڕێی وه‌زیری نه‌وت ده‌كرا و هه‌ركاتێك دانرا ئه‌وكات شاندی حکوومەتی هه‌رێم ئاماده‌یه بۆ گفتوگۆ و چاوه‌ڕێی حکوومەتی عێراقە.
فارس عیسا، سه‌رۆكی نوێنه‌رایه‌تیی حکوومەتی هه‌رێمی كوردستان له به‌غدا، بۆ ماڵپه‌ڕی فه‌رمیی پارتی دیموكراتی كوردستان گوتی: "حکوومەتی هه‌رێمی كوردستان چاوه‌ڕێی ته‌واوكردنی كابینه‌ی نوێی حکوومەتی عێراقە كه بڕیاره ڕۆژی شه‌ممه كابینه‌ی نوێ ته‌واو بكرێت و ڕه‌وانه‌ی په‌رله‌مان بكرێت و ده‌نگی له‌سه‌ر بدرێت و په‌سه‌ند بكرێت و هه‌ركاتێك دواتر حکوومەتی عێراق خۆی ئاماده كرد، حکوومەتی هه‌رێمی كوردستان بۆ گفتوگۆ ئاماده‌یه."
فارس عیسا گوتیشی: "دوای ته‌واوبوونی كابینه‌ی نوێی حکوومەتی عێراق شاندی حکوومەتی هه‌رێمی كوردستان دێته به‌غدا، چونكه حکوومەتی هه‌رێمی كوردستان دوو مه‌له‌ف له‌گه‌ڵ به‌غدا یه‌كلایی ده‌كاته‌وه، ئه‌وانیش مه‌له‌فی دارایی، كه وه‌زیری دارایی هه‌یه و وه‌زیری نه‌وت، كه ئه‌و هێشتا یه‌كلایی نه‌كراوه‌ته‌وه و چاوه‌ڕێ ده‌كرێت ئه‌ویش یه‌كلایی بكرێته‌وه بۆ ئه‌وه‌ی شاندی هه‌رێم بێته به‌غدا."
عیسا ڕوونیشی كرده‌وه: "هه‌ركاتێك حکوومەتی عێراق داوای كرد شاندی هه‌رێم ئاماده‌یه، بۆیه چاوەڕێی حکوومەتی عێراقین، ئه‌گه‌رنا حکوومەتی هه‌رێمی كوردستان ئاماده‌یه بۆ گفتوگۆ و هیچ كێشه‌یه‌كی نییه."
بڵند ئیبراهیم
