English | عربي

لەبارەی قەرزی نیشتەجێبوون و غەرامەی دواكەوتن وەزارەتی دارایی روونكردنەوە دەدا


لەبارەی قەرزی نیشتەجێبوون و غەرامەی دواكەوتن وەزارەتی دارایی روونكردنەوە دەدا

2019/06/25 | 15:20

(هەواڵ كوردستان)-  

عوسمان کوردە، بەڕێوەبەری پشکنین و چاودێری لە بەڕێوەبەرایەتیی گشتیی بانکە پسپۆرییەکان بە (باس)ی راگەیاند: "ئەوانەی لە پڕۆژەكانی نیشتەجێبوون لە قەرزی سندوقی نیشتەجێبوون پارەیان وەرگرتووە، دەبێ قیستەكانیان بدەنەوە، هەروەها غەرامەی دواكەوتنیش بدەنەوە كە 10%ی كۆی ئەو قەرزەیە، كە وەریانگرتووە".

ساڵانە قیستی پارەكە زیاتر لە یەک ملیۆن دینارە، ئەو کەسەی نەتوانێت مانگانە قیستەکەی بداتەوە، ساڵانە زیاتر لە 350 هەزار دینار سزای دواكەوتنی دەخرێتە سەر.

روونیشی كردەوە، 10%ی غەرامەی دواكەوتنی قەرزەكە بەپێی ئەو قیستەیە كە لەسەری كەڵەكە بووە، چەند ساڵ قیستەكەی دوا خستبێت، ئەوا 10%ی غەرامەی دواكەوتنی لێ وەردەگیرێت، گوتیشی: "هیچ رێنماییەكی تازە نییە 10%ی غەرامە نەدرێت، بەڵكوو مەرجێكی بنەڕەتییە و دەبێت لە پاڵ قیستی ساڵانەدا ئەویش بدرێت، ئەوەی لە كاتی خۆی قەرز بداتەوە، هیچ غەرامەیەكی لێ وەرناگیرێت".

كاتی خۆی بۆ كڕینی یەكەكانی نیشتەجێبوون، حكوومەت نیوەی پارەی یەكەكانی داوە، بۆ نموونە كەسێك خانوویەكی بە 5 هەزار دۆلار كڕیبێت، 2 هەزار و 500 دۆلاری لە لایەن حكوومەت بە قەرز پێ دراوە.

عوسمان کوردە، دووپاتی كردەوە، حكوومەت لە ماوەی ئەو چەند ساڵەی قەیران تەنیا قەرز و پێشینەكانی ئەو كەسانەی وەرنەگرتووە، كە فەرمانبەرن، گوتیشی: "قەرزی سندوقی نیشتەجێبوون پەیوەندیی بە فەرمانبەرەوە نییە، دەبێت فەرمانبەر و هاووڵاتی بیدەنەوە".

سەبارەت بەو كەسانەی قەرزەكەیان لەسەر كەڵەكە بووە و فەرمانبەرن گوتی: "ئەوەی پێشووتر وەكوو هاووڵاتی ئەو قەرزەی وەرگرتووە و دەیەوێت ئێستا بیخاتە سەر فەرمانبەری، ئەوا دەبێت قەرزە كەڵەكەبووەكانی پێشوو پاكتاو بكات، پاشان ئەوەی ماوە دەخرێتە سەر مووچەی فەرمانبەرییەکەی".

بەرپرسەكەی وەزارەتی دارایی جەختی كردەوە، كێشەیەكی زۆریان هەیە لەبارەی قەرزی نیشتەجێبوون و كەڵەكەبوونی قەرزەكان، دەشڵێت: "هاووڵاتی هەیە زیاتر لە 10 ملیۆن قەرزی لەسەر كەڵەكە بووە، هەروەها زۆر لە یەكەكانی نیشتەجێبوون كڕین و فرۆشتنیان پێوە كراوە، كەچی زۆر لەو كەسانە نازانن لای ئێمە رەهن لەسەر خانووەكە هەیە".

ئاشكراشی كرد، ئەگەر لەسەر پاشەكەوتی مووچە كێشەی قەرزی نیشتەجێبوون چارەسەر بكرێت، ئەوا بە یەكجاری ئەو كێشانەیان نامێنێت، گوتیشی: "ئەوەی پاشەكەوتی مووچەی لای حكوومەت بێت، ئەوكات كە بەر قەرزەكە خرا، ئەوا دۆسێكەی دادەخرێت، بەڵام هیچ بڕیارێك نییە بۆ لێخۆشبوون، بۆ ئەو قەرزانە تەنیا لە پاشەكەوتی مووچە ئەوە دەكرێت".

 

 








نیشانەکردن



زۆرترین






ڤیدیۆ- وێنە





Trending