تەندروسی هەرێم کوردستان مەرجیگ دانەێد ئەرا سوکەوکردن قەیەغە
شەفەق نیوز/ محمد قادر قسەکەر وەناو وەزارەت تەدروسی لە هەرێم کوردستان، ئمڕوو جومعە، دووپاتکرد ک تووشهاتنەگان هیمان بەرزە، بەڵکم هالە ژیر کۆنتڕۆڵ، و هووشداریدا ئەگەر دانیشتوەیل پابەند وە ریکارە مقەیەتیەگان نەوون، رەوشەگە لە کۆنتڕۆڵ دەرچوود.
قادر لەوەڵامەگەی ئەرا ئاژانس شەفەق نیوز لە کاریگەری قەیەغە گشتگیرەگە لە هەولێر و بەشیگ لە ناوچەگان لەبان کۆنتڕۆڵ کردن تووشهاتنەگان، وت؛ کاریگەری قەیەغەگە شایەت دویای دوو هەفتە دیار بیەێد، وئیسە تووشهاتنه‌گان هیمان بەرزە، بەڵکم رەوشەگە ها ژیر کۆنترۆڵ و خەسەخانەگان پڕن لە تووشهاتگەیل.
وتیش: ئەگەر هاووڵاتەیل پابەند نەوین وە ریکارە مقەیەتیەگان، رەوشەگە لە کۆنتڕۆڵ دەرچوود.
لەوەڵامەگەی لەبان پرسیاریگ لە باوەت پێشنیار وەزارەت تەندروسی وە دریژە کردن قەیەغە گشتگیرەگە وت: ئیمە تا ئیسە پێشنیاریگ وە وەردەوامی قەیەغە گشتگیرەگە نەیایمنە، وەلی ئووشیمن لاوردن قەیەغەگە بایەسە وە پلە پلە بوود، نەگ وەیەکجا لاوریەێد. ودیاری کرد ک بایەسە قەیەغەگە لە بازاڕەیل وه پله هەڵگریەێد و تەنانەت فەرمانگە حکومەتیەگان، بایەسە وەپلە پلە بوود تا بتویەنیمن کۆنتڕۆڵ رەوشەگە بکەیمن.
ئاماژەیە ک حکومەتە خۆجێیەگان سەروە چوار پارێزگای هەرێم کوردستان و وەڕیەوبەرایەتیە سەوەخوەیەگان راپەڕین و گەرمیان و ژوور ئۆپراسیۆنەیلیان وەی دویاییە ریکارەیل سەختیگ چەسپانن، جوور قەیەغەی گشتگیر و پشۆی دەوام فەرمی تا سەرەتای هەفتەی هاتگ ئەرا نواگردن لە بڵاوبوین پەتاگە.
وەزارەت ناوخۆی هەرێم کوردستان لە هەفتەی گوزەیشتە بڕیاردا وە به‌خشین دەسڵاتەیل وه ژوورە ئۆپراسیۆنەگان دژوە ڤایڕۆس کۆرۆنا ک سەروە حکومەت خۆجێیە لە چوار پارێزگاگە و ئیدارە سەروەخوەیەگان لە راگەیانن پشۆی دەوام فەرمی و چەسپانن قیەغەی هاتووچگن گشتگیر.
