هەواڵی کوردستان ئێستا

شەفەق نیوز/ وەرپرسیگ خۆجێی لە پارێزگای بەسرە، پێشنیار کرد لە داناین چارەسەرییگ ئەرا گەردین گامیش ک فرەیگ لەلیان چووچیایەسە ناوچەیل ناوەند پارێزگاگە و ناحیەگانی، وداواکرد ک سەریان بووڕیەێد و گوشتەگەی بەشەو بکریەێد.
لە پارێزگای بەسرە گەردین ئاژەڵ جورا جور لە جادەیلی باوە جوور مانگا و گامیش، لە ناوچەیلیگ خوەی لە بنچینەو کشتوکاڵی نیە، و فرە لە هاووڵاتیەیل داواکەن وە چارەسەرکردنی ک لەسای جیوەجیکردن قیەغەی هاتووچگنەگە لەوەر پەتای کۆرۆنا زیایەوبوی.
حەیدەر توعمە عبادی قایمقام قەزای شەتولعەرەب ئەرا ئاژانس شەفەق نیوز وت: پێشنیاریگ دیریمن ک دەسبنیەێدە بان هەر رێیه‌نیگ گامیش لە جادەگان و چەرمیان بگریەێدەو و گووشتەگەیان بوریەێد، و ئاماژەدا ک کەرت وەڕیەوبردن قەزاگە نیاز و رک و توانا دیرێد ئەرا چارەسەرکردن ئی سیما، بەڵکم خاڵە لاوازەگە هالە چوونیەتی رەفتارکردن وەل گامیشەگان، ک پزشک ئاژەڵی خوازێد تا وەهووشەو بوەیدیان و کار دەسناین لەبانیان کار سەختیگە و ئاسان نیە.
عبادی پێشنیار کرد ک ئەو گامیشەیلە ک وە هەڕەمەکی لەناو جادەگان گەردن بوریەن ئەرا قەساوخانە و دەسبنریەێدە بان گووشتەگەیان و بفرووشیەن تا بوودە نموونە و چارەسەرییگ ئەرا هەرکەسیگ گرنگی نیەێدە ئی سیما و رەفتارە ك کاریگەری لەبان رەوشەگە و جوانی پارێزگاگە دیرێد.
قایمقام شەتولعەرەب داوا لە پارێزگار بەسرە کرد دەسەیگ لە پزشک ئاژەڵی و کشتوکاڵ دروس بکەێد وەل فەرماندەی ئۆپراسیۆن بەسرە و فەرماندەی پۆلیس ئەرا سنورناینیگ لەی باوەتە، یا وە خەوەردارکردن خاوەن گامیشەگان ك فرەیان هانە دیشت سنور شەتولعەرەب، یا کاربکەن لەبان ئی پێشنیارە ک خستیمنەی وەردەس ودەسناین لەبان ئاژەڵەگان دویای لەهووشبردنیان ، و رەوانەی قەساوخانە بکریەن، و ئەو ریکارە یاساییەگان بوریەێد.