2019/09/06 | 20:50
(هەواڵ كوردستان)-
K24 - كه‌ركووك:
دەستەی دەستپاکی عێراق لە ڕاپۆرتێکدا پەردە لەسەر گەندەڵی سەدان پڕۆژەی تەواونەکراو هەڵدەماڵێت کە بڕەکەی 370 ملیۆن دۆلارە و داوای روونکردەنەوە و بەدواداچوون دەکات، یەکێك لەپڕۆژەکان درووستکردنی فڕۆکەخانەی کەرکووکە.
سەرۆکی لێژنەی دەستپاکی لە ئەنجوومەنی پارێزگای کەرکووک دەڵێت: "پڕۆژەکان بەبێ هیچ چاودێرییەك و چەند کەسێك لە ژوورە تاریکەکاندا بڕیاری لێدەدەن و بەشێک لە ئەندامانی ئەنجوومەنیش شەریکن".
هاوڵاتیانیش دەڵێن پڕۆژە لە شارەکەیان نییە و زبڵ و خاشاك هەراسانی کردوون.
بەڵگەکانی گەندەڵی لەسەر ئیدارەی ئێستای کەرکووك زیاتر ئاشکرا دەبن و فشارەکانیش بۆ لێپرسینەوە چڕتر دەبنەوە، دوا ڕاپۆرتی دەستەی دەستپاکی عێراق بە بڕی 370 ملیۆن دۆلار، پەردەی لەسەر گەندەڵییەکانی 167 پڕۆژەی تەواونەکراو هەڵماڵیوە و داوای ڕوونکردنەوە و بەداداچوون دەکات.
نەجات حوسێن، تورکمانێکی شیعە مەزهەبە و سەرۆکی لێژنەی دەستپاکیە لە ئەنجوومەنی پارێزگای کەرکووك، ئەو بەوە ناسراوە بەردەوام قسەی خۆی لەسەر پرسەکانی گەندەڵی ئیدارەی دوای 16ى ئۆکتۆبەر هەبێت، ئەمجارەشیان بەڕاشکاوی لەسەر ئەم پرسە قسەی کرد.
نه‌جات حوسێن ده‌ڵێت: " 361 پرۆژه، جێبه‌جێكردنی راسته‌وخۆیه، جێبه‌جێكردنی راسته‌وخۆش واتا گه‌نده‌ڵی راسته‌وخۆ، چاودێر و پێداچوونه‌وه و وردبینی نییه".
سەرچاوەکانی داهاتی کەرکووك، پترۆدۆلار و پەرەپێدانی هەرێمەکان و یارمەتی ڕێکخراوە نێودەوڵەتییەکان و چەندین شێواز و جۆری دیکەیە، بەڵام بەوتەی هاووڵاتیان ئەو داهاتە بۆ خزمەتی خەڵك خەرج ناکرێن و رۆژ بە رۆژیش سیمای شاربوونی لە دەست دەدات.
بە وتەی بەشێک لە ئەندامانی ئەنجوومەن، بەهۆی نەبوونی دەسەڵاتی چاودێری بەسەر ئیدارەی شارەوە، وایکردووە قۆرخکاری و گەندەڵی زۆر لە پڕۆژەکاندا هەبێت و پارەیەکی زۆر بەهەدەر بدرێت.
پارێزگاری سەپێنراوی کەرکووك، بەهۆی ئەو سکاڵایانەی لەسەر کەیسەکانی گەندەڵی لەسەریەتی لەماوەی دوومانگدا، دووجار بانگهێشتی دادگا کراوە و هێشتا ئەستۆپاکی خۆی لەسەر ئەو کەیسانە نەسەلماندووە.
ئ.
م
