ئەرا نواگردن لە گردەوبوین لەوەر کۆڕۆنا سەڵاحەدین سەرباز خەێدە جادە
شەفەق نیوز/ سەرچەوەیگ ئەمنی لە سەڵاحەدین، ئمڕوو جومعە، خەوەردا وە پاڵپشتی ئەمنی لە گشت کەرتە ئیداریەگان ئەرا چویچانن گردەوبوینە کۆمەڵایەتیەگان، ئەرا مقەیەتی لە بڵاوبوینیگ گەوراتر لە پەتای کۆڕۆنا.
سەرچەوەیگ لە فەرماندەیی ئۆپراسیۆن سامەڕا ئەرا ئاژانس شەفەق نیوز وت: فەرماندەگە بڕیگ لە سوپا و پۆلیس فیدڕاڵی و حەشد شەعبی رەوانەکرد وەرەو ٤ قەزا و ٨ ناحیە لە پارێزگاگە، ئەرا قەیەغەکردن پرسە و سویر کۆمەڵی ک بویە هووکار لە بڵاوبوین پەتای کۆڕۆنا، و رەسینی وەرەو دوڕیان مەترسیداریگ وەگورەی ئاماره‌یل گوزەیشتە.
وتیش؛ فەرماندەی ئۆپراسیۆن سامەڕا وەگەرد وەڕیەوبردن پارێزگاگە رێککەفت ئەرا ئامادەکردن سەکوەیل هووشیاری کردن راگەیانن لە ری کەناڵەیل ئاسمانی پارێزگاگە، و ماڵپەڕەیل پەیوەندیە کۆمەڵایەتیەگان، ئەرا پشتگیری و پاڵپشتی لە پلانە ئەمنی و تەندروسیەگان لە نواگردن و بڵاوبوین کۆڕۆنا.
جی باسە ک پارێزگای سەڵاحەدین، لە ماوەی هەفتەیل گوزەیشتە هەلقوڵان گەورایگ لە تووشهاتنەیل کۆڕۆنا وەخوەی دی. وەگورەی دویاترین ئامار لە ماوەی ٧٢ ساعەت گوزەیشتە هەژمار تووشهاتنەگە رەسیە ٤٢٦ تووشهاتگ. شانەی قەیرانەگە لە پارێزگاگە چەسپانن قەیەغەی گشتگیری ئەرا نواگردن و بڵاوبوین کۆڕۆنا دویرەوخست لەوەر هووکارەیلیگ کۆمەڵایەتی و ئنسانی.