هەواڵی کوردستان ئێستا

حکوومەتی بەریتانیا داوا لە هاووڵاتیانی لە شارەکانی عێراق دەکات، ئەو وڵاتە بەجێ بهێڵن.

ئەمڕۆ شەممە 4-1-2020، دۆمینیک راپ، وەزیری دەرەوەی بەریتانیا لە بەیاننامەیەکدا، رایگەیاندووە، چاودێریی بارودۆخی عێراق دوای کوژرانی ئەبومەهدی موهەندیس و قاسم سولەیمانی، دەکەن.

دۆمینیک راپ داوای لە هاووڵاتیانی وڵاتەکەی کردووە خۆیان لە چوونە عێراق بپارێزن و ئەگەر لەوێشن، ئەوا ئەو وڵاتە بەجێ بهێڵن.

هەروەک لە بەیاننامەکەدا هاتووە، وەزیری دەرەوەی بەریتانیا رایگەیاندووە، ئەو داوایە تەنیا عراق دەگرێتەوە و هاووڵاتییانی بەریتانی لە گەشتکردن بۆ هەرێمی کوردستان، ئازادن و دەتوانن بەشێوەیەکی ئاسایی گەشتەکەیان بکەن.

بەرەبەیانی رۆژی هەینی 3-1-2020، سوپای ئەمریکا لەڕێی فڕۆکەی بێفڕۆکەوانەوە، کاروانێکی چەکداریی حەشدی شەعبی لە فڕۆکەخانەی بەغدا بۆردومان کرد.

بەهۆی بۆردومانەکەوە، هەریەکە لە ئەبومەهدی موهەندیس، جێگری سەرۆکی دەستەی میلیشیاکانی حەشدی شەعبی و قاسم سولەیمانی، فەرماندەی سوپای قودسی سەر بە سوپای پاسدارانی ئێران و نۆ بەرپرس و چەکداری دیکەی حەشدی شەعبی، کوژران.

حەشدی شەعبی لە زیاتر لە 60 گرووپ و میلیشیای تائیفیی توندڕەو پێک دێت، کە دوای هەرەسهێنانی سوپای عێراق و داگیرکردنی نزیکەی نیوەی خاکی ئەو وڵاتە لەلایەن رێکخراوی تیرۆریستی داعش، بە فەرمانی ئایەتوڵڵا عەلی سیستانی، مەرجەعی باڵای شیعەکانی عێراق پێک هات.

چەکدارانی ئەو میلیشیایانە، کە زۆرینەیان فەرمان لە کۆماری ئیسلامیی ئێران وەردەگرن، گوێ بە هیچ یاسا و دابونەریتێک نادەن و بە توندترین و خراپترن شێوە مامەڵە لەگەڵ هاووڵاتییانی عێراق، بەتایبەت پارێزگا سوننەنشینەکان، دەکەن.

لە مانگی 6ـی 2014، نزیکەی دوو هەزار چەکداری رێکخراوی تیرۆریستی داعش هێرشیان کردە سەر شاری مووسڵ و لە ماوەی چەند رۆژێکدا، هەرەسیان بە سوپای عێراق هێنا و زۆربەی ناوچەکانی پارێزگاکانی نەینەوا، دیالە، سەڵاحەدین و ئەنباریان داگیر کرد.