English | عربي

پەروەردەی كەلار كارئاسانی بۆ قوتابیانی ئاوارەی خورماتوو دەكات


پەروەردەی كەلار كارئاسانی بۆ قوتابیانی ئاوارەی خورماتوو دەكات

2017/10/24 | 09:17

(هەواڵ كوردستان)- "داوا لە قوتابخانەكان دەكرێت بەبێ بەڵگەی خوێندن وەریان بگرن"

بەڕێوەبەرایەتیی پەروەردەی كەلار لە ئاگادارییەكدا كە ئاراستەی سەرجەم قوتابخانە و خوێندنگە بنەڕەتی و ئامادەییەكانی سنووری پەروەردەكەی كردووە، داوا دەكات بەپێی توانا و هەبوونی جێگە، لە وەرگرتنیان لە قوتابخانە و خوێندنگەكاندا، هاوكاریی خێزانە ئاوارەكانی خورماتوو بكەن.

 

لە ئاگادارییەكەی بەڕێوەبەرایەتیی پەروەردەی كەلار، كە وێنەیەكی بۆ (باسنیوز) نێردراوە، هاتووە: "ئاگاداری بەڕێوەبەری سەرجەم قوتابخانە و خوێندنگە بنەڕەتی و ئامادەییەكانی سنووری پەروەردەكەمان دەكەین، هەریەكە و بەپێی توانا و هەبوونی جێگە بەمەبەستی، وەرگرتنیان لە قوتابخانە و خوێندنگاكانتان هاوكاریی قوتابیانی خێزانە ئاوارەكانی خورماتوو بكەن و ئەگەر بە شێوەی گوێگریش بێت بۆ ئەوەی ئەمساڵی خوێندنیان بەفیڕۆ نەچێت".

 

لە ئاگادارییەكەدا داوا كراوە "داوای هیچ بەڵگەیەكی خوێندن، یان بڕوانامەیەكیان لێ مەكەن تا ئەوكاتەی دۆخی ئەمنیی شارۆچكەكە ئارام دەبێتەوە و توانای گەڕانەوەی شارۆچكەكەیان دەبێت".

 

بەپێی ئاگادارییەكە "بەڕێوەبەری پەروەردەی كەلار دەسەڵاتی تەواوی داوە بە بەڕێوەبەرەكان بۆ هەر كارئاسانییەك بۆ قوتابیانی ئاوارە".

 

بێستوون ژاڵەیی بەرپرسی بەشی كاروباری مرۆیی لە ئیدارەی گەرمیان، بە (باسنیوز)ی ڕاگەیاند "لەكۆی 7 هەزار هاونیشتمانیی دانیشتووی شارۆچكەی خورماتوو كە ئاوارە بوون، زیاتر لە 5 هەزاریان لە سنووری ئیدارەی گەرمیان نیشتەجێ بوون و لەو ژمارەیەش 765 خێزانیان لە كەلار و 1400 خێزانیان لە شارەدێی ڕزگارین، هاوكات بە بۆنەی جووڵەی سوپای عێراقەوە، 125 خێزانی دیكەی گوندی شێخ باوە و سنووری شارەدێی كۆكس ئاوارەی كەلار بوون".








نیشانەکردن



زۆرترین






ڤیدیۆ- وێنە





Trending