مەحما خەلیل: بۆ ڤەگەریانا شنگال كوردێن ئێزدی پێدڤی ب دەڤەرەكا ئارامن
قایمقامێ قەزا شنگالێ راگەهاند، هێشتا كوردێن ئێزدی نە ڤەگەریاینە سەر مال و مولكێن خوە ل شنگال و جهێن دی و بۆ ڤەگەریانێ ژی كوردێن ئێزدی پێدڤی ب دەڤەرەكا ئارامن.
مەحما خەلیل، قایمقامێ قەزا شنگالێ بۆ (باسنیوز) دیار كر، هەبوونا گرۆپێن سەر ب پەكەكێ ڤە ل شنگالێ، ئەگەرێ سەرەكی یێ ڤەنەگەریانا ئێزدیانە، ژ بەر كو پەكەكە رێزێ ل قانوونێن عیراقێ ناگریت و دەڤەر بۆ خوە كرییە مەیدانا بازرگانی و چەكداركرنا زارۆیان و هندی رەوش هوسا یا بەردەوام بیت و هێزێن بیانی و پەكەكە د شنگالێ دا هەبن و دەڤەر یا ئارام نەبیت، ب چو رەنگان كوردێن ئێزدی ڤەناگەرن.
قایمقامێ شنگالێ، داخواز ژ جڤاكا نێڤدەولەتی و حكومەتێن هەولێر و بەغدایێ كر، دەڤەرەكا ئارام بۆ ڤەگەریانا ئێزدییان چێكەت، ب رەنگەكی ئەمریكا و حكومەتێن هەرێم و بەغدا سەرپەرشتییا وێ بكەن.
نێزیكی 350 هزار كوردێن ئێزدی نها ل كەمپێن پارێزگەها دهۆكێ د بن خیڤەتان دا دژین و ل گۆرەی ئاخفتنێن ناڤبری، ئەڤ خیڤەتە بۆ ئێزدیان ئارامترن ژ ژیانێ ل بەر سیبەرا پەكەكێ دا.