هەواڵی کوردستان ئێستا

هەولێر -KDP.info- ڕووداوەکانی کۆتاییی ساڵی ڕابردوو لە عێراق بۆ بازرگانان زیانی ھەبووە و سەرۆکی ژووری پیشەسازی و بازرگانیی پارێزگای دھۆکیش جەختی کردەوە، زۆربەی بازرگانانی ھەرێم کەلوپەل ڕەوانەی ناوچەکانی باشوور و ناوەڕاستی عێراق دەکەن و ئاستەنگیان بۆ پەیدا بووە.

ئەیاد حەسەن، سەرۆکی ژووری بازرگانی و پیشەسازیی دھۆک، بە ماڵپەڕی فەرمیی پارتی دیموکراتی کوردستانی ڕاگەیاند: "ڕەوشی ئابووری و بازرگانی پەیوەستە بە سەقامگیریی سیاسی و ئەمنییەوە، لەبەر ئەوەش، ئاڵۆزییەکانی دوو مانگی ڕابردووی عێراق کاریگەرییان لەسەر جووڵەی بازرگانی ھەبووە لە ھەرێمی کوردستان بەگشتی و بەتایبەت لە سنووری پارێزگای دھۆک، چونکە ئیبراھیم خەلیل دەروازەیەکی نێودەوڵەتییە و ٨٠%ی ھەموو ئەو کەلوپەلانەی ھاوردە دەکرێن بۆ ناوچەکانی باشوور و ناوەڕاستی عێراق دەچێت، زۆرجار دەبینین ڕێگە دەگیرێت لە نێوان پارێزگاکانی عێراق و ئاستەنگ بۆ جووڵەی بارزگانی دروست دەبێت."

سەرۆکی ژووری پیشەسازی و بازرگانیی دھۆک دەڵێت: "سەرەڕای ئاستەنگەکان، بازرگانانی ھەرێمی کوردستان بەردەوامن لەسەر کارەکانیان، بەردەوامیش جووڵەی بازرگانی ھەیە بۆ ناوچەکانی دیکەی عێراق لەگەڵ ئەوەی ئاڵۆزی لە ھەندێ ناوچەی عێراق بەردەوامە."

ئەیاد حەسەن ئاماژەی بۆ ئەوە کرد: "ئەگەر باس لە ناوخۆی پارێزگای دھۆک بکەین ڕەوشەکە زۆر باشترە، لەبەر ئەوەی ڕەوشی ناوخۆی ھەرێمی کوردستان سەقامگیرە و ژمارەی کۆمپانیا و کارگەکان زیادیان کردووە، کێبڕکێیەکی زۆر لە کەرتی بازرگانیدا ھەیە، بەتایبەتی ئەو کۆمپانیانانەی بریکاری کۆمپانیاکانی جیھانیان بەدەست ھێناوە، جووڵەی زیاتریان ھەیە."

قائید میرۆ