مونا قاوەچی: ئامانج لە یاسای چاکسازی هێنانەدی دادپەروەییە لە نێوان چین و توێژەکانی کۆمەڵگادا
خەندان-
سکرتێری پەرلەمانی کوردستان رایگەیاند، ئامانجی پەرلەمانی کوردستان لە دەرچوانی یاسای چاکسازی بەشێکە لە هەوڵە بەردەوامەکان بۆ هێنانە کایەی دادپەروەری لە نێوان چین و توێژەکانی کۆمەڵگادا.
مونا قاوەچی، سکرتێری پەرلەمانی کوردستان لە کاتی پێشکەشکردنی سیمینارێک بۆ ئەندامان و سەربازانی فەرماندەیی هێزی زێرەڤانی هەولێر رونیکردوەتەوە، "پێویستە ئەو پێکەوەژیانە کە شانازییەکی گەورەیە بۆ هەرێمی کوردستان بپارێزرێت و برەوی زیاتری پێبدرێت و زیاتر بە نێو کایەکانی کۆمەڵگەدا قوڵبێتەوە".
لەبارەی رۆڵی هێزە پێشمەرگە لە تێکشکاندنی داعش، باسی لەوەکردوە " هێزی پێشمەرگە بە رابەرایەتی جەنابی سەرۆک مەسعود بارزانی داستانی گەورەیان بۆ هەرێمی کوردستان و سەرجەم جیهان تۆمار کرد و توانیان ئەفسانەی داعش تێک بشکێنن و بە زەلیلی نیشانی هەموو جیهانیان بدەن".
لەسەر پرسی چاکسازیش، سکرتێری پەرلەمانی کوردستان ئەوەی خستوەتەڕو "ئەو پڕۆسەیە بەردەوام دەبێت بە مەبەستی هێنانەکایەوەی دادپەروەری زیاتر لە نێوان سەرجەم چینو توێژەکانی هەرێمی کوردستان".