ل دهۆكێ ب نهێنی پشكنینا ئایدزێ دهێنە ئەنجامدان
بەرپرسێ پشكا كۆنترۆلكرنا نەخۆشیا ئاێدزێ ل ساخلەمیا دهۆكێ دیاركركو دەست ب پشكنینا ئایدزێ بۆ وەلاتیان هاتیە كرن ب شێوەیەكێ نهێنی و بێ بەرامبەر بتنێ ئارمانج ژی ئەوە هەكە نەخۆشی دەڤ كەسەكێ هەبیت بهێتە كۆنترۆل كرن.
د. فەرهاد ئیسماعیل، بەرپرسێ پشكا كۆنترۆلكرنا نەخۆشیا ئاێدزێ ل ساخلەمیا دهۆكێ بۆ (باسنیوز) دیار كر كو دەمێ پشكنینا نهێنی دهێتە كرن بۆ كەسەكێ هەموو ناڤ ونیشان وێ/وی كەسی دهێنە پاراستن وناهێنە ئاشكراكرن هەكە ئەو كەس بڤیت ناڤێ وی ژی ناهێتە وەرگرتن بتنێ دێ پشكنینن بۆ هێتە ئەنجامدان. مە دەست ب ڤی كاری كریە ل سنۆرێ دهۆكێ وهژمارەكا زۆر وەلاتیان هاتینە پشكنیكرن. ئەڤ سالە هیچ حالەتەكێ ئایدزێ ل دهۆكێ نەهاتیە تۆماركرن. ژ سالا 2010ێ وەرە هەتا نۆكە نەه حالەتێن ئایدزێ هەبووینە ل دهۆكێ، ژوانا ژی سێ كەسان گیانێ خوە ژدەستدایە و شەش كەس ژیانێ دا ماینە وبەردەوام چارەسەری وەردگرن. ل دهۆكێ هەموو جۆرێن چارەسەری هەنە بێ بەرامبەر دەینە وان نەخۆشان یێن تووشی ئایدزێ دبن".
خویا ژی كر: "ئەڤ سالە ژی رێڤەبەریا كارۆبارین خوە پاراستنا ساخلەمیا دهۆكێ دگەل زانكۆیا زاخۆ چەندین چالاكی ئەنجامداینە ب مەرەما هۆشیاركرنا وەلاتیان و خەلكێ هانبدەن پشكنینێ خوە ئەنجام بدەن داكو كۆنترۆل لسەر نەخۆشیا ئایدزێ بهێتە كرن. نها شیوەیەكێ باش پشكنینن دهێنە كرن".