هاوڵاتیانی هەرێمی کوردستان لەگەڵ بارینی بەفرا ڕوو لە ناوچە شاخاوییەکان دەکەن
لە وەرزی زستانی هەموو ساڵێکدا لە ناوچە کوێستانییەکانی هەرێمی کوردستان و بەتایبەتیش ناوچە شاخاوییەکان، بڕێکی زۆر لە بەفر دەبارێت.
هاوڵاتیان بۆ بەسەربردنی کاتێکی خۆش لەگەڵ خێزانەکانیان یان هاوڕێکانیاندا پەیتا پەیتا ڕوو لە ناوچە بەفراوییەکان دەکەن.
ئارام جەبار کە هاوڵاتییەکی شاری سلێمانییە و ڕووی لە چیای ئەزمەڕ کردووه، بۆ دەنگی ئەمەریکا دوا و وتی "ئەمە یەکێکە لە کلتوورەکانی سلێمانی و هەموو ساڵێک دووبارە دەبێتەوە. خوێندکاران دێنە دەرەوە. خەڵک دێنە دەرەوە. هەموو ساڵێک دەڵێین ئەزمەڕ و گۆیژە تارای سپییان پۆشیوە."
بەشێکی هاوڵاتیان خەریکی یاری شەڕەتۆپەڵ دەبن، هەندێکیان بە درووستکردنی بووکەبەفرینەوە سەرقاڵن و ئەوانی تریش لە ناو سەرماسۆڵەی بەفرەکەدا خەریکی وێنەگرتنن.
میوانانی ئەم دیمەنە سرووشتییە جوانەی زستان تەنها خەڵکانی ناوچە کوێستانییەکان نین، بەڵکو لەگەڵ بارینی بەفردا، هاوڵاتیانی باشووری هەرێمی کوردستان و باشووری عێراقیش دەکەونە ڕێ و وەکو گەشتیار سەردان دەکەن.
ڕێکار ئیسماعیل کە خەڵکی دەرەوەی شارە و لە سلێمانیدا خوێندکارە، وتی "لە دوای تاقیکردنەوەکانی ئەمڕۆ و لەگەڵ چەند برادەرێکدا پێمان خۆشبوو سەردانێکی ئێرە بکەین. لەبەر ئەوەی ئەمە یەکەم بەفری ئەمساڵە باریوە. ئەمە مایەی دڵخۆشی ئێمەیە و کەشێکی جیاوازە. "
ئەو هاوڵاتیانەی بۆ دەنگی ئەمەریکا دوان باسیان لەوە کرد، لەناوەڕاستی کۆمەڵێکی زۆر لە قەیران و کێشە و مەینەتیی ئابووری و سیاسیی و تەندرووستی کە هاوڵاتیان پێیدا تێپەڕدەبن، ئەوان بارینی بەفر بە هەل دەزانن تاکو بەشێک لەو مەینەتییانەیان ببیرچێتەوە و کاتێکی خۆش بەرنە سەر.
