هەواڵی کوردستان ئێستا

 هەڵەبجە-KDP.info- بڕیار بوو لە چەند ڕۆژی ڕابردوودا لەسەر فەرمانی سەرۆكوەزیران مەسروور بارزانی، 53 بەركەوتووی چەكی كیمیایی ڕەوانەی وڵاتی ئێران بكرێن بۆ وەرگرتنی چارەسەر، بەڕێوەبەری گشتیی تەندروستیی پارێزگای هەڵەبجەش دەڵێ، بە هۆی مەترسیی ڤایرۆسی كۆرۆناوە، ناردنەدەرەوەی بەركەوتووان ڕاگیراوە.

د. ئازاد مستەفا، بەڕێوەبەری گشتیی تەندروستیی پارێزگای هەڵەبجە، بە ماڵپەڕی فەرمیی پارتی دیموكراتی كوردستانی ڕاگەیاند: "بڕیار بوو لە چەند ڕۆژی ڕابردوودا 53 بەركەوتووی چەكی كیمیایی بۆ چارەسەر بنێرینە دەرەوەی وڵات، بەڵام بە هۆی تەشەنەكردنی ڤایرۆسی كۆرۆنا لە وڵاتان و مەترسیی نەخۆشییەكە، بڕیار درا پڕۆسەكە ڕابگیردرێت".

مستەفا زیاتر دەڵێ: "بەركەوتووانی چەكی كیمیایی باری تەندروستییان جێگیر نییە و نابێت هیچ مەترسییەكی تری تەندروستی لەسەریان دروست ببێت، بۆیە ئێمەش وەك وەزارەت و بەڕێوەبەرایەتیی گشتیی تەندروستیی هەڵەبجە، بڕیارمان دا بۆ پاراستنی بەركەوتووانی چەكی كیمیایی، بۆ ماوەیەك ناردنەدەرەوەی بەركەوتووان بۆ چارەسەر دوابخەین".

بەڕێوەبەری گشتیی تەندروستیی پارێزگای هەڵەبجە ئاماژەشی دا: "تەواوی ئامادەكارییەكان بۆ ناردنەدەرەوەی بەركەوتووان بەكۆتا گەیشتوون و حكوومەت زیاتر لە 100 ملیۆن دیناری بۆ 53 بەركەوتووەكەی چەكی كیمیایی تەرخان كردووە، ئەگەربێت و تا ڕۆژی هەینیی ئایندە دۆخی جیهان لەبارەی ڤایرۆسی كۆرۆناوە سەقامگیری بەخۆیەوە ببینێت، بڕیار هەیە بەركەوتووانی چەكی كیمیایی ڕەوانەی دەرەوە بكرێن بۆ وەرگرتنی چارەسەرەكەیان".

 

عەزیز رەسووڵ