شابەندەر باسی خۆكاندیدكردنی بۆ پۆستی سەرۆك وەزیرانی عێراق دەكات
ئێوارەی ئەمڕۆ سێشەممە عیزەت شابەندەر كەسایەتیی سیاسیی سەربەخۆی عێراق لەبارەی دەنگۆی خۆكاندیدكردنی بۆ پۆستی سەرۆك وەزیرانی كاتیی عێراق رایگەیاند كە هیچ لایەنێك ئەوی كاندید نەكردووە و داوای وەرگرتنی ئەم پۆستەی لێ نەكراوە.
شابەندەر بەیاننامەیەكی بڵاوكردووەتەوە و تیایدا رەتی كردووەتەوە خۆی كاندید كردبێت یان هیچ لایەنێك كاندیدی كردبێت بۆ ئەوەی ببێتە سەرۆك وەزیرانی حكومەتی كاتیی عێراق.
سیاسەتمەدارە عێراقیەكە لە بەیاننامەكەیدا دەڵێ "لەم ساتە هەستیارەدا كە هاووڵاتیانی هەژار و بێبەش لە دژی گەندەڵی و گەندەڵكاراندا ڕاپەڕیون، ناشێ من ببمە كاندیدی لایەنەكانی دەسەڵات دابەش دەكەن بۆ وەرگرتنی ئەم پۆستە، خۆم ناخەمە بەرداشی كاندیدەكانەوە".
شابەندەر دەڵێ ڕۆڵ و خەباتی ئەو بۆ بنیاتنانی عێراق و داهاتووی گەلەكەی بووە و هیچ ڕۆژێكیش لەم خەباتە نەوەستاوە، هیچ كاتێكیش هەوڵی بەدەستهێنانی پۆست و بەرپرسیارییەتی نەداوە.
ئەمەش لە كاتێكدایە كە ئەمڕۆ میدیاكانی عێراق باسیان لەوە كرد كە شابەندەر كاندیدی سەرۆك وەزیرانی كاتیی عێراقە و لایەنە سیاسییەكان لەسەری ڕێككەوتوون.
جێی باسە پێویستە لە ماوەی پێنج ڕۆژی داهاتوودا كاندیدێك بۆ پۆستی سەرۆك وەزیرانی كاتی پێشكەشی پەرلەمانی عێراق بكرێت.
