پشکی ھەرێمی کوردستان لە پڕۆژەیاسای بودجەی گشتى عێراق یەکلایی ده‌كرێته‌وه
دیجیتاڵ میدیاى سپێده
ئەندامێكی ئەنجوومەنی نوێنەرانی عێراق رایگه‌یاند، چاوەڕوان دەکرێت لە میانی ئەم ھەفتەیەدا، پشکی ھەرێمی کوردستان لە پڕۆژەیاسای بوودجەی گشتیی ٢٠٢١، یەکلایی بکرێتەوە و ئاماژە بەوەیش دەکات کە دواکەوتنی دەنگدان لەسەر پڕۆژەیاساکە، کاریگەریی لەسەر وادەی ئەنجامدانی ھەڵبژاردنی پێشوەختە دەبێت.
رێزان شێخ دلێر لە لێدوانێکی رۆژنامەوانییدا گوتی: دواکەوتنی دەنگدان لەسەر پڕۆژەیاسای بوودجەی گشتیی ٢٠٢١، لەبەرژەوەندی ھیچ لایەکدا نییە، بەتایبەتیش کە وادەی ئەنجامدانی ھەڵبژاردنی پێشوەختە نزیکبووەتەوە.
گوتیشی: بە تەرخانکردنی بوودجەیەکی تایبەت، دەبێتە ھۆی ئەوەی کە خێراتر ئامادەکارییەکان بۆ ئەنجامدانی ھەڵبژاردنی پێشوەختە لە وادەی دیاریکراوی خۆیدا، تەواو بکرێن.
رێزان شێخ دلێر ئاشکراشیکردووە، تا ئێستا ھەولێر و بەغدا لەبارەی جێگیرکردنی پشکی ھەرێمی کوردستان لە پڕۆژەیاسای بوودجەی گشتیی ٢٠٢١ نەگەیشتوون بە رێککەوتن و گوتی: چاوەڕوان دەکرێت لە میانی ئەم ھەفتەیەدا، پشکی ھەرێمی کوردستان لە پڕۆژەیاسای بوودجەی گشتیی ٢٠٢١، یەکلایی بکرێتەوە بۆ ئەوەی وادەی کۆتایی بۆ دەنگدان لەسەر پڕۆژەیاساکە دیاری بکرێت.
