سەرۆکی ئەرکانی سوپای سعوودیە گەیشتە بەغدا
دیجیتاڵ میدیاى سپێده
سەرۆکی ئەرکانی سوپای سعوودیە، فەیاز روەیلی بەسەردانێک گەیشتە بەغدا کە لە میانیدا، ھەماھەنگیی ئەمنی و سەربازیی نێوان ھەردوو وڵات لەگەڵ بەرپرسانی عێراق تاوتوێ دەکات.
ئاژانسی ھەواڵیی فەرمی عێراق بڵاویکردەوە کە فەیاز روەیلی گەیشتووەتە بەغدا، بێ ئەوەی ھیچ وردەکارییەک لەوبارەیەوە بخاتەڕوو.
ھاوکات ئەفسەرێک بە پلەی رائید لە وەزارەتی بەرگریی عێراق بە ئاژانسی ئانادۆڵوی راگەیاند کە سەرۆکی ئەرکانی سوپای سعوودیە، فەیاز روەیلی سەردانی وەزارەتی بەرگریی عێراقی کردووە و لەلایەن سەرۆکی ئەرکانی سوپای عێراقەوە، عەبدولئەمیر رەشید یارەڵڵا-وە پێشوازی لێکراوە.
سەرچاوەکە کە نەیویست ناوی ئاشکرا بکرێت ئاماژەی بەوەدا کە چاوەڕوان دەکرێت سەرۆکی ئەرکانی سوپای سعوودیە، فەیاز روەیلی لە چوارچێوەی سەردانەکەیدا بۆ بەغدا، ھەماھەنگیی ئەمنی و سەربازیی نێوان ھەردوو وڵات لەگەڵ بەرپرسانی عێراق تاوتوێ بکات.