د.موسه‌ننا ئه‌مین، ناوه‌ڕۆكى كۆبوونه‌وه‌ى له‌گه‌ڵ مسته‌فا كازمى ئاشكرا ده‌كات
دیجیتاڵ میدیاى سپێده
په‌رله‌مانتارێكى فراكسیۆنى یه‌كگرتوو له په‌رله‌مانى عێراق رایده‌گه‌یه‌نێت: هیچ بیانوویه‌ك نیه بۆ ئه‌وه‌ى حكومه‌تى عێراق، هه‌ڵه‌بجه وه‌كو پارێزگاى نۆزده‌یه‌م رابگه‌یه‌نێت و له پلانه‌كانى وه‌زاره‌تى پلاندانان جێی بكاته‌وه.
د.موسه‌ننا ئه‌مین له كۆنگره‌یه‌كى رۆژنامه‌وانیدا رایگه‌یاند، ئه‌مڕۆ له‌گه‌ڵ د.به‌ختیار سه‌ردانى سه‌رۆكى ئه‌نجومه‌نى وه‌زیرانى عێراقمان كرد، سه‌ردانه‌كه له‌سه‌ر داواى ئێمه بوو، تایبه‌ت بوو به گه‌یاندنى ده‌نگ و ره‌نگى خه‌ڵكى پارێزگاى هه‌ڵه‌بجه، هه‌روه‌ها بۆ یه‌كلایی كردنه‌وه‌ى كۆمه‌ڵێك بابه‌تى هه‌ڵپه‌سێردراو، كه چه‌ندین ساڵه مافى خه‌ڵكى ئێمه پێشێل ده‌كرێت و وه‌كو پێویست جێبه‌جێ ناكرێت.
ئاماژه‌ى به‌وه‌شكرد، گرنگترین ئه‌و بابه‌تانه‌ى باسمان كرد، پرسى ته‌واو كردنى به پارێزگا كردنى هه‌ڵه‌بجه بوو، باسى ئه‌وه‌مان كرد به پێى ده‌ستوورى عێراق، پێویسته هه‌موو بڕیاره‌كانى حكومه‌ت و په‌رله‌مانى هه‌رێمى كوردستان جێبه‌جێ بكرێت كه یه‌كێك له‌وانه به پارێزگا بوونى هه‌ڵه‌بجه‌یه، بۆیه ئێستا هیچ بیانوویه‌ك نیه بۆ ئه‌وه‌ى حكومه‌تى عێراق، هه‌ڵه‌بجه وه‌كو پارێزگاى نۆزده‌یه‌م رایگه‌یه‌نێت و له پلانه‌كانى وه‌زاره‌تى پلاندانان جێی بكاته‌وه.
