لیژنەی ئافرەتانی پەرلەمان: له هەواڵی كوژرانی كچ و ژنان نیگه‌رانین
دیجیتاڵ میدیاى سپێده
لیژنەی داكۆكیكردن لەمافی ئافرەت لەپەرلەمانی كوردستان رایگەیاند: هەواڵی كوژرانی كچ و ژنان لەهەرێمی كوردستان لەهەڵكشاندایە و ئامارەكانی ئەو پرسە جێی نیگەرانی و تێڕامانی قوڵن.
لیژنەی داكۆكیكردن لەمافی ئافرەت لەپەرلەمانی كوردستان لەبەیاننامەیەكدا بڵاویانكردوەتەوە: سەركۆنەی كوشتنی ئافرەتان دەكات لەژێر هەر پاساو و بیانویەك بێت، روداوی كوشتنی ژنێك لەلایەن هاوسەرەكەیەوە لەهەولێر تەنها رووداو نییە كە بەهۆی بونی هەندێك لەعەقڵیەتی ژن كوژ و بەكەم سەیركردنی مافی ژنانە و بەردەوام روو دەدات.
ئەوەش هاتوە: ئەوان وەك لیژنەی پەیوەندیدار لەپەرلەمان بەوردی بەدواداچوون وچاودێری بۆ كەیسەكانی كوشتنی ئافرەت وجێبەجێكردنی رێكارە یاساییەكان بۆ بە سزا گەیاندنی تاوانباران دەكەن وپاڵپشتی خۆیان بۆ هەنگاوەكانی دەسەڵاتی جێبەجێكردن و دادوەری بۆ سەپاندنی سزای یاسایی توند بەسەر تاوانباران و ئەنجامدەرانی ئەم تاوانانە دوپات كردوەتەوە.
لیژنەكە دەشڵێت: هەوڵەكانیان چڕ دەكەنەوە بۆ ئەوەی یاسایەكی نوێ سەبارەت بەبەرەنگاربونەوەی توندوتیژی خێزان و ئافرەت لەم خولەی پەرلەماندا دەربكرێت و تێدا رێكارەكانی سزادانی تاوانبارانی كەیسەكانی كوشتنی ئافرەت زۆر توندتر بكرێن و ببنە بەربەست بۆ بنبڕكردن و كەمكردنەوەی ئەو دیاردە نامرۆڤانە و تاوانە ناشارستانیەی كەلەلایەن هەندێك لەخاوەن هزری دواكەوتو و بێ ویژدانەوە ئەنجام دەدرێت.
لیژنەی داكۆكیكردن لەمافی ئافرەت جەختیلەوەشكردوەتەوە: لەهەموو ئەمجۆرە كەیسانە پێویستە حكومەت خاوەندارێتیان بكات و رێگە بە سوڵح و رێككەوتنی عەشایەری نەدات و سزای توندی ئەوانە بدرێت تاوانی كوشتن ئەنجامدەدەن، لەپاڵ یاسادا پێویستە لایەنە پەیوەندیدارەكان بەئەركی خۆیان هەڵبستن لە پەروەردە و رۆشبیری و هۆشیاركردنەوەی كۆمەڵگە، تاوەكو عەقڵیەتە ژن كوژەكان بپوكێنەوە و بونیان لە كۆمەڵگەدا ببێتە مایەی شەرم و شەرمەزاری.
