سه‌رۆك بارزانى په‌یامێكى لەبارەی بارودۆخی هەنووكەیی عێراق بڵاو كرده‌وه
"لە هەر گۆڕانكارییەكدا پێویستە مافی هەموو پێكهاتەكان ڕەچاو بكرێت"
سه‌رۆك بارزانى په‌یامێكى لەبارەی بارودۆخی هەنووكەیی عێراق بڵاو كرده‌وه و ڕاى ده‌گه‌یه‌نێت: "لە هەر گۆڕانكارییەكدا پێویستە مافی هەموو پێكهاتەكان ڕەچاو بكرێت، هەر گۆڕانێك دەبێ بەپێی میكانیزمە دەستوورییەكان بێت".
ئه‌مڕۆ شه‌ممه 30/11/2019، سه‌رۆك بارزانى په‌یامێكى بڵاو كرده‌وه و ده‌ڵێت: "بە بایەخەوە بەدواداچوون بۆ پەرەسەندنەكانی ئەم دواییە دەكەین و پێشوازی لە هەر هەنگاوێكیش دەكەین كە كاریگەری لەسەر چارەسەركردنی قەیرانەكە هەبێت و ڕێگە لە ڕووخان و فەوزا یان گەڕانەوە بۆ سەردەمی دیكتاتۆرییەتی شووم بگرێت".
سه‌رۆك بارزانى هه‌روه‌ها باسى له‌وه كردووه: "لە هەر گۆڕانكارییەكیشدا پێویستە مافی هەموو پێكهاتەكان ڕەچاو بكرێت، هەر گۆڕانێك دەبێ بەپێی میكانیزمە دەستوورییەكان بێت. هەروەها ئامانج لێی چەسپاندنی ئاساییش و سەقامگیری و باڵادەستیی یاسا بێت و داواكارییە ڕەواكانی جەماوەری بەشخوراویش بەدی بهێنێت".
هه‌ر له په‌یامه‌كه‌دا سه‌رۆك بارزانى ڕاى گه‌یاندووه: "هەر لێرەدا ئیدانەی توندوتیژییە بەردەوامەكان و كوشتنی خەڵكی بێگوناح دەكەین، سەرەخۆشیش لە كەسوكاری شەهیدان دەكەین و هیوای چاكبوونەوەی خێرایش بۆ برینداران دەخوازین".
ده‌قى په‌یامه‌كه‌ى سه‌رۆك بارزانى:
بەناوی خودای بەخشندە و میهرەبان
بە بایەخەوە بەدواداچوون بۆ پەرەسەندنەكانی ئەم دوایە دەكەین و پێشوازی لە هەر هەنگاوێكیش دەكەین كە كاریگەری لەسەر چارەسەركردنی قەیرانەكە هەبێت و ڕێگە لە ڕووخان و فەوزا یان گەڕانەوە بۆ سەردەمی دیكتاتۆرییەتی شووم بگرێت. لە هەر گۆڕانكارییەكیشدا پێویستە مافی هەموو پێكهاتەكان ڕەچاو بكرێت و، هەر گۆڕانێك دەبێ بەپێی میكانیزمە دەستوورییەكان بێت. هەروەها ئامانج لێی چەسپاندنی ئاساییش و سەقامگیری و باڵادەستیی یاسا بێت و داواكارییە ڕەواكانی جەماوەری بەشخوراویش بەدی بهێنێت.
هەر لێرەدا ئیدانەی توندوتیژییە بەردەوامەكان و كوشتنی خەڵكی بێگوناح دەكەین و، سەرەخۆشیش لە كەسوكاری شەهیدان دەكەین و هیوای چاكبوونەوەی خێرایش بۆ برینداران دەخوازین.
مسعود بارزانی
30ـی 11ـی 2019