ئەڵمانیا داوا لە ھاووڵاتیانی دەکات بەپەلە ئۆکرانیا جێبھێڵن
2022-02-19 00:00:00 - سەرچاوە: سپێده
بەپێی ئەو راگەیەندراوەی لە وەزارەتی دەرەوەی ئەڵمانیا بڵاوکراوەتەوە، ھۆشداریی دراوە بە ھاووڵاتییانی ئەڵمانیا لەبارەی پرسی گەشتکردن بۆ ئۆکراینا.
لە راگەیەندراوەکەدا بانگھێشتی ھاووڵاتیانی ئەڵمانیا کراوە کە بەپەلە و لە کاتی خۆیدا ئۆکراینا جێبھێڵن.
ھەر لە راگەیەندراوەکەدا ئەوەشخرایەڕوو کە لە ئەگەری ھێرشی رووسیا بۆسەر ئۆکراینا ئەوا توانای پشتیوانیکردنی ھاووڵاتییانی ئەڵمانیا سنووردار دەبێت.
راشگەیەندرا کە "شەڕ و پێکدادانی سەربازیی لەھەر ساتێکدا ئەگەری ھەیە سەرھەڵبدات".
پێشتر ھێڵی ئاسمانی ئەڵمانی Lufthansa رایگەیاندبوو کە لە ٢١ی شوباتەوە گەشتە ئاسمانییەکانی لەگەڵ کیێڤ رادەگرێت.
