سه‌رۆكايه‌تى هه‌رێم و حكومه‌ته‌گه‌ى سێ مليار دينار ئه‌را فرياكه‌فتن دهۆك ته‌رخان كردن
شه‌فه‌ق نيوز/ نێچيروان بارزانى سه‌رۆك هه‌رێم كوردستان، ئاشكراى ته‌رخانكردن بڕ يه‌ك مليار دينار عراقى كرد ئه‌را فرياكه‌فتن پاريزگاى دهۆك ك لافاو وێرانكه‌ر روێ له‌لى كردگه.
له‌ى باوه‌ته‌و سه‌رۆكايه‌تى هه‌رێم له به‌ياننامه‌يگ ئه‌را شه‌فه‌ق نيوز وت: بارزانى په‌يوه‌ندى ته‌له‌فۆنى كرده‌سه فه‌رهاد ئه‌تروشى پاريزگار دهۆك و ناڕه‌حه‌تى و داخدارى خوه‌ى ده‌رخستگه‌و پرسه‌و سه‌ره‌خوه‌شى پيشكه‌ش وه كه‌س وكار هه‌ردوگ قوربانيه‌گه كردگه ك له‌ئه‌نجام لافاوه‌يل له مه‌رزه‌يل پاريزگاگه له سيمێل و زاخۆ خنكيان.
به‌ياننامه‌گه وت: سه‌رۆك هه‌رێم گوزارش له ده‌سميه‌تداين كار ده‌زگايه‌يل په‌يوه‌نديدار كردگه ئه‌را فرياكه‌فتن زره‌دمه‌نه‌يل و ئاماژه وه‌يه‌يش كرد بارزانى بڕياره داگه بڕ يه‌ك مليار دينار له‌لايه‌ن سه‌رۆكايه‌تى هه‌رێمه‌و پيشكه‌ش وه ئداره‌ى پاريزگاى دهۆك بكريه‌ێد جوور ده‌سميه‌تيگ وه‌په‌له.
لاى خوه‌ييشه‌و، مه‌سرور بارزانى سه‌رۆك حكومه‌ت هه‌رێم كوردستان فه‌رمان دا وه ته‌رخانكردن 2 مليار دينار عراقى ئه‌را ده‌سميه‌تداين زه‌ره‌دمه‌نه‌يل له ئه‌نجام لافاوه‌يل له پاريزگاى دهۆك.