پەیامنێری ئەلجەزیرە شیرین ئەبو عاقلە بە تەقەی سەربازانی ئیسرائیل کوژرا
دیجیتال میدیای سپێده
خانمە پەیامنێری کەناڵی تەلەڤیزیۆنی ئەلجەزیرە، شیرین ئەبو عاقلە لە کەمپی پەنابەرانی جەنین لە کەناری خۆرئاوای داگیرکراو، بە تەقەی سەربازانی ئیسرائیل گیانی لەدەست دا.
بەپێی راگەیەندراوێکی وەزارەتی تەندروستیی فەڵەستین، خانمە پەیامنێر شیرین ئەبو عاقلە-ی تەمەن 51 ساڵ لە ئەنجامی دەستڕێژی گولـلەی سەربازانی ئیسرائیل کە گولـلەی راستەقینەیان بەکارهێناوە، سەری بە سەختی بریندار بووە و پاشان گیانی لەدەستداوە.
شیرین ئەبو عاقلە رووماڵی ئەو هەڵمەتەی دەکرد کە سوپای ئیسرائیل بۆسەر کەمپی جەنین ئەنجامی دەدا.
شیرین ئەبو عاقلە لە ساڵی 1971 لە شاری قودس لە دایکبووبوو و بڕوانامەی بەکالۆریۆسی لە میدیا و رۆژنامەوانی لە زانکۆی یەرموک لە ئوردن بە دەست هێنابوو و بۆ ماوەی 25 ساڵ پەیامنێری کەناڵی تەلەڤیزیۆنی ئەلجەزیرەی قەتەری بوو لە کەناری خۆرئاوای داگیرکراو.
