بۆچى هه‌ولێر؟
2019-11-30 00:00:00 - سەرچاوە: ئه‌ڤرۆ نيوز
بۆچى هه‌ولێر؟ هه‌ولێر ناڤه‌نده‌ك گرنگ بۆ چارسه‌ریێ ره‌مه‌زان نسردین كێڤلى گومان تێدا نینه ل سه‌د سالێن بۆرى كێشه و گرڤت ل رۆژهه‌لاتا ناڤه‌راست به‌رده‌وام بووینه، چونكو د بنه‌ره‌تا دا هژماره‌كا كێشه‌یێن سه‌ره‌كى مینا كێشا كوردى نه‌هاتیه چاره‌سه‌كرن، له‌ورا ژى به‌رده‌وام ده‌ڤه‌را د ئالۆزى و ناكۆكى و ركه‌به‌یێن به‌رده‌وام دابووینه و پتریا وه‌لاتێن هه‌رێمایه‌تى كار ل سه‌ر بهێزكرنا پێگه‌هێن خوه كرینه ل سه‌ر كیستێ وه‌لاتێن دى و د ئه‌نجامێ وێ دا ژى به‌رده‌وام ناكۆكیێن گه‌له‌ك مه‌زن هه‌بووینه هه‌تاكو گه‌هشتیه سه‌رهلدانا گرۆپێن توندڕه‌و و تیرۆرست ل ده‌ڤه‌رێ و به‌رژوه‌ندیا پتریا وه‌لاتان بكه‌ڤیته د مه‌ترسیێ دا و سروشتێ په‌یوه‌ندیێن ئه‌ڤان وه‌لاتێن هه‌رێمایه‌تى، تایبه‌ت ئیران توركیا عیراق سووریا و پارچه‌ك ژ وه‌لاتێن ه‌نداڤى نه‌دورست بوویه، له‌ورا ناڤه‌ندێن بریارێ ل پتریا ڤان وه‌لاتان لاواز بووینه و هێلێن ستراتیژى یێن وه‌لاتێن وان كه‌تینه مه‌ترسیێ دا مینا پاراستنا ئاسایشا نه‌ته‌وه‌یێ یان ئه‌ڤان وه‌لاتان یانژى تێكچوونا به‌رژوه‌ندیێن وان یانژى لاوازبوونا هه‌ڤپه‌یمانێن وان. د ناڤبه‌را ئه‌ڤان ئالۆزیێن ده‌ڤه‌رێ هه‌یێن گه‌له‌ك جاران ژبلى وه‌لاتان رێكخراوێن نیڤده‌وله‌تى یان هه‌رێمێن مینا هه‌رێما كوردستانێ یانژى كه‌سایه‌تێن سیاسى رۆلێ خوه هه‌یه و ئه‌ڤه تشته‌كێ ئاشكه‌رایه ل په‌یوه‌ندیێن نیڤده‌وله‌تى دا، له‌ورا دێ بینى كو ل قووناغێن بۆرى هه‌ولێر بوویه ناڤه‌نده‌كا ستراتیژیا یا گرنگ ل ده‌ڤه‌رێ، بۆ نموونه: د بابه‌تێ دژه‌تیرۆرێ دا هه‌ولێر وه‌كو هه‌ڤپه‌یمانه‌كێ ستراتیژى بوویه ل سه‌ر ئه‌ردى نه‌هێلایێ ده‌وله‌تا بناڤ ئیسلامى زووتر گه‌شێ بكه‌ت، به‌لكو رۆلێ هه‌ولێرێ زۆرێ گرنگ بوویه بۆ ژناڤبرنا تیرۆرێ ل ده‌ڤه‌رێ، سه‌ره‌راى وان هه‌مى ئابلۆقه و ره‌وشا ئابووریا لاوازا هه‌رێمێ. د بابه‌تێ ئاشتیێ دا چ ل باكۆرێ كوردستانێ یانژى ل ده‌ڤه‌رێن دى پتریا هه‌لویستێن هه‌ولێرێ ل گه‌ل چاره‌سه‌ریێن ئاشتیانه بوویه بۆ كێشا كوردى قه‌د د گه‌ل شه‌ر و ناكۆكى و توندیێ نه‌بوویه و به‌رده‌وام ئامۆژگارى داینه لایه‌نێن كوردى و د هه‌مى په‌یوه‌ندین خوه دا هه‌ولدان كرینه مفایێ ژ ئه‌زمۆنا ئاشتیانه وه‌ربگرن بۆ چاره‌سه‌ریا كێشه‌یێن ئه‌ڤان وه‌لاتان هه‌تاكو دووماهی بابه‌ت ل رۆژئاڤایێ كوردستانێ رۆلێ نه‌راسته‌خوه‌یێ ل هه‌ولێرێ گه‌له‌ك كاریگه‌ر بوویه د ئێكلاكرنا گه‌له‌ك بابه‌تان دا و دبیت ل قووناغێن داهاتى ئه‌نجانێن باشتر ژى بهێنه دیتن ل سه‌ر پرسا رۆژئاڤایێ كوردستانێ. ل راگرتنا به‌لانسا هێزێ، هه‌ولێر نه‌بوویه ناڤه‌نده‌ك بۆ ئالى سه‌نگیا هێزێ دژى چ وه‌لاتان، به‌لكو پێچه‌وانه شیایه وێ به‌لانسێ رابگریت و د خزمه‌تا چاره‌سه‌ریا كێشه‌یێن ده‌ڤه‌رێ دا بكاربینبت. بابه‌تێ په‌ناهندان كو مه‌زنترین كێشا نوكه جیهان تێدا پرسا په‌ناهندا نه هه‌ولێر شیایه ببته جهێ ڤه‌حاوندا ب هزاره‌هان خه‌لكێ په‌ناهند، به‌لكو بارسڤكیه‌كێ بۆ جڤاكێ نیڤده‌وله‌تى دورستكریه. ب دیتنا من هاتنا جێگرێ سه‌رۆكێ ولایه‌تێن ئێكگرتیێن ئه‌مریكا و چه‌ندین شاندنێن دى مینا وه‌زیرێن ده‌رڤه بۆ هه‌ولێر ئاماژێن گه‌له‌ك رۆهن و ئاشكه‌را نه كو پێگه‌هێ هه‌ولێرێ دوباره بابه‌تێن چاره‌نڤیساز دا ل ده‌ڤه‌رێ زۆرێ گرنگه و دشێت ببته جهێ بریاردانێ بۆ چارسه‌ركرنا گه‌له‌ك كێشه‌یێن هه‌یێن، چ ل عێراقێ یان سووریێ و توركیا و ئیرانێ، به‌لێ گومان تێدا نینه پێدڤیه ل هه‌ولێرێ ژى ستراتیژیه‌ته‌ك گرنگ و نه‌ته‌وه‌یێ هه‌بیت و ب دورست خواندنا ئالۆزیێن ده‌ڤه‌رێ بهێته‌كرن هه‌تاكو دوباره رۆلێ وێ نه‌هێته لاوازكرن یان به‌رته‌نگ كرن، هه‌روه‌كو ل قووناغا به‌رى 16 ئوكتوبه‌رێ سه‌رهلدایێ دڤێت هه‌ولێر ئه‌ڤێ ره‌وشێ ب ده‌لیڤه بزانیت د یاریا خوه‌یا سیاسى دا پتر پێگه‌هێ خوه بهێز بكه‌ت و په‌ره‌یێ ب به‌رژوه‌ندیێن هه‌رێمێ بده‌ت ل سه‌ر هه‌مى ئاستان و ل ناڤخوه‌یا هه‌رێمێ ژى ب زووترین ده‌م چاكسازیێ و پاكسازى بهێته‌كرن و ناڤمالا كوردى بهێته رێخستن هه‌تاكو به‌رده‌وام ئه‌ڤ رۆل و پێگه‌هه بمینیت..