وەزارەتی شارەوانی زەوی بۆ چەندان نەخۆشخانەی تایبەت بە کۆرۆنا دابین دەکات
هه‌ولێر-KDP.info- گوته‌بێژی وه‌زاره‌تی شاره‌وانی و گه‌شتوگوزاری حكوومه‌تی هه‌رێمی كوردستان گوتی، بۆ ڕێگریكردن له بڵاوبوونه‌وه‌ی نه‌خۆشیی كۆرۆنا، وه‌زاره‌تی شاره‌وانی زه‌ویی بۆ دروستكردنی پێنج نه‌خۆشخانه‌ی تایبه‌ت به كۆرۆنا دابین كردووه .
كوردۆ شابان، گوته‌بێژی وه‌زاره‌تی شاره‌وانی و گه‌شتوگوزاری حكوومه‌تی هه‌رێمی كوردستان، بۆ ماڵپه‌ڕی فه‌رمیی پارتی دیموكراتی كوردستان گوتی: "بۆ ڕێگریکردن لە بڵاوبوونەوەی ڤایرۆسی کۆرۆنا، حکوومەتی هەرێمی کوردستان لە ڕێی دروستکردنی لیژنە بۆ بەرەنگاربوونەوەی ئەو ڤایرۆسە بە سەرپەرشتیی سەرۆک و جێگری سەرۆکی ئەنجومەنی وەزیران و ڕاپەڕاندنی کارەکان لەلایەن وەزارەت و فەرمانگە پێوەندیدارەکانەوە، بەردەوامە لە ڕزگارکردنی هاووڵاتیان. وەزارەتی شارەوانی و گەشتوگوزار، لەپاڵ وەزارەتەکانی تەندروستی و ناخۆ و وەزارەت و فەرمانگە پێوەندیدارەکانی تر، بە بەردەوامی گەیاندنی ئاوی خاوێن بۆ ماڵەکان کە باشترین جۆری کلۆر و شەب بەکار دێت و بە چەندان فلتەری جیاوازی خاوێنکردنەوە دەڕوات، هەروەها بەردەوامیدان بە کاری تیمەکانی ئاوەڕۆ بۆ ئەوەی ژینگەی شار و شارۆچکەکان لەم کاتەدا بە خاوێنی بمێنێتەوە و هەڵگرتنەوەی خاشاکی ماڵان وەک ڕۆژانی ئاسایی و بەردەوامیدان بە خزمەتی پارکی ناو شار و شارۆچکەکان، ئەگەر ئەم ماوەیە خزمەت نەکرێن، ڕەنگە وشک ببن و زیانی زۆریان پێ بکەوێت."
كوردۆ شابان گوتیشی: "تیمەکانی شارەوانی بێ پشوودان لە خزمەتی هاووڵاتیانن، بۆ بەرەنگاربوونەوەی کۆرۆنا، لە هەموو شار و شارۆچکەکان، بە هەماهەنگی لەگەڵ وەزارەت و فەرمانگە پێوەندیدارەکان، بەردەوام خەریکی دەرمانڕێژکردنی تەواوی بازاڕ و گەڕەکەکانن، کە هۆکارێکی بنەڕەتییە بۆ کوشتنی هەر جۆرە ڤایرۆسێک، ئەگەر گەیشتبێتە ناو بازاڕ و شەقامەکان."
ڕوونیشی كرده‌وه: "جیا لەوانە، وەزارەتی شارەوانی و گەشتوگوزار، لە ڕێی بەڕێوەبەرایەتیی گشتی و سەرۆکایەتیی شارەوانییەکانییەوە تا ئێستا زەویی بۆ چەندان نەخۆشخانەی تایبەت بە کۆرۆنا دابین کردووە، وەک لە خوارەوە ئاماژەیان پێ دەدرێ:
- دابینکردنی زەوی بۆ نەخۆشخانەیەکی 70 قه‌ره‌وێڵه‌یی لە شاری هەولێر.
- دابینکردنی زەوی بۆ نەخۆشخانەیەکی 64 قه‌ره‌وێڵه‌یی له شاری هه‌ڵه‌بجه.
- دابینکردنی زەوی بۆ نەخۆشخانەیەکی 70 قه‌ره‌وێڵه‌یی له شاری كه‌لار.
- دابینکردنی زەوی بۆ نەخۆشخانەیەکی 20 قه‌ره‌وێڵه‌یی له شارۆچكه‌ی پێنجوێن.
- دابینکردنی زەوی بۆ نەخۆشخانەیەکی 100 قه‌ره‌وێڵه‌یی له شارۆچكه‌ی چوارقوڕنه.
له كۆتاییدا گوتی: "وێڕای ئامادەباشیی تیمەکانی شارەوانی بۆ ڕووبەڕووبوونەوەی کۆرۆنا، بەهۆی بارانی زۆری ڕۆژانی ڕابردوو، شارەوانییەکان بۆ نەهێشتنی دروستبوونی لافاو و گەیشتنی زیان بە هاووڵاتیان، بەردەوام خەریکی چارەسەرکردنی هەر گرفتێکن لە هەرشوێنێک دروست بووبێت."
ڵند ئیبراهیم
