لە سلێمانی دەست بەسەر زياتر له 35 کیلۆگرام ماددەی ھۆشبەردا گیرا
دیجیتاڵ میدیای سپێده
لە میانی ئۆپەراسیۆنێکی ھێزەکانی ئاژانسی ھەواڵگریی و لێکۆڵینەوەی فیدراڵیی سەربە وەزارەتی ناوخۆی عێراق لە پارێزگای سلێمانی، دەست بەسەر ٣٥ کیلۆ و ٩٠٠ گرام ماددەی ھۆشبەردا گیرا.
شانەی راگەیاندنی ئەمنی سەربە نووسینگەی سەرۆکوەزیرانی عێراق لە راگەیەندراوێکدا ئاماژەی بەوەداوە کە پشت بەستن بە زانیارییە ھەواڵگرییەکان، ھێزەکانی ئاژانسی ھەواڵگریی و لێکۆڵینەوەی فیدراڵیی سەربە وەزارەتی ناوخۆ لە میانی ئۆپەراسیۆنێکدا لە پارێزگای سلێمانی، دەستیان بەسەر ٣٥ کیلۆ و ٩٠٠ گرام ماددەی ھۆشبەر لە جۆری تلیاکدا گرتووە.
ئاماژەی بەوەیشداوە، ھەوڵداربوو ماددە ھۆشبەرەکە کە لەناو بارێکی بۆڕی ئەلەمنیۆمدا لە بارھەڵگرێکدا حەشاردرابوو لە سنووری پارێزگای سلێمانییەوە بھێندرێتە ناو خاکی عێراق.
راشیگەیاندووە کە شۆفێری بارھەڵگرەکە دەستگیرکراوە و لەگەڵ ماددە ھۆشبەرەکە، رادەستی لایەنە پەیوەندیدارەکان کراون.