هەواڵی کوردستان ئێستا

دیجیتال میدیای سپێده‌

بانگەشەی ئەوە کرا کە دامەزرێنەری کۆمپانیای تێسلا و سپەیس ئێکس، ئێڵن ماسک پێشنیارێکی نوێی پێشکەشی کۆمپانیای تویتەر کە داوای یاسایی لەگەڵیاندا هەیە کردووە و لە پێشنیارەکەیدا بڕی 54،2 دۆلار بۆ هەر پشکێک نەگۆڕیوە.

لە هەواڵێکی کەناڵی بلوومبێرگ کە زانیارییەکەی بۆ سەرچاوەیەکی نادیاری گەڕاندووەتەوە، ئاماژە بەوە کراوە کە ماسک ئەو پێشنیارەی لە رێگەی نامەیەکەوە بۆ تویتەر ناردووە.

لە هەواڵەکەدا، ئەوە خراوەتەڕوو کە ماسک دیسانەوە 54،2 دۆلاری وەکو نرخی یەک پشکی بۆ تویتەر پێشنیار کردووە.

هاوکات لەگەڵ ئەو هەواڵە، پشکەکانی تویتەر لەدوای راوەستان بۆ کاتێکی کورت بەهای تاکو سەدا ١٨ی بەدەستهێنا.

ئێڵن ماسک، کە پێشتر سەدا 9،2ی پشکی تویتەری کڕیبوو لە 14 نیسان لە راگەیەندراوێکیدا بۆ کۆمسیۆنی دراو و بۆرسای ئەمریکا (SEC) پێشنیاری نرخی 54،2 دۆلاری بۆ هەر پشکێک بۆ کڕینی تەواوی تویتەر پێشکەش کردبوو.

لەو راگەیەندراوەی کە 25ی نیسان لە تویتەرەوە بڵاو کرایەوە، ئاماژە بەوە کرابوو کە گەیشتوونەتە رێککەوتنی فرۆشتنی کۆمپانیاکە بە ئێڵن ماسک.

ماسک لە 13ی ئایاردا ئەوەی راگەیاندبوو کە بۆ ماوەیەکی کاتی رێککەوتنی کڕینی کۆمپانیای تویتەر بە بڕی 44 ملیار دۆلاری هەڵپەساردووە.

ماسک دەربارەی هەڵپەساردنی رێککەوتنەکە لەهەژماری خۆی لە تویتەر ئەوەی رایگەیاندبوو کە "چاوەڕێی وردەکارییەکانی لێکدانەوی سەبارت بە هەژماری ساختە و سپام دەکات کە کەمتر لە سەدا ٥ی بەکارهێنەران پێکدەهێنێت".

دامەزرێنەری کۆمپانیای تێسلا و سپەیس ئێکس، ئێڵن ماسک لە 8ی تەمووز بە بیانووی پێشێلکردنی زیاتر لە بڕگەیەکی رێککەوتنەکەی نیشاندا و هەڵوەشاندنەوەی رێککەوتنی کڕینی تویتەری راگەیاندبوو.