ھەوڵێک بۆ بەقاچاغبردنی 31 بگۆڕی کارەبا لە کەرکووک پووچەڵ کرایەوە
2022-10-11 00:00:00 - سەرچاوە: سپێده
دیجیتال میدیای سپێده
لە میانی ئۆپەراسیۆنێکی ھێزە ئەمنییەکانی عێراقدا لە پارێزگای کەرکووک، ھەوڵێک بۆ بەقاچاغبردنی 31 بگۆڕی کارەبا (مەحاویلە) پووچەڵ کرایەوە.
وەزارەتی ناوخۆی عێراق لە راگەیەندراوێکدا ئاماژەی بەوەداوە کە ھێزەکانی ئاژانسی ھەواڵگریی و لێکۆڵینەوەی فیدراڵیی سەربە وەزارەتی ناوخۆ لە میانی ئۆپەراسیۆنێکدا لە پارێزگای کەرکووک دەستیان بەسەر بارھەڵگرێکدا گرتووە کە 31 بگۆڕی کارەبای بەشێوەیەکی نایاسایی تیایدا بارکرابوو.
راشیگەیاندووە کە لە میانی ئۆپەراسیۆنەکەدا، شۆفێری بارھەڵگرەکە دەستگیرکراوە، ھەروەھا دەست بەسەر بگۆڕەکاندا گیراوە.
باسی لەوەش کردووە کە دەستگیرکراوەکە و بگۆڕەکان رادەستی لایەنە پەیوەندیدارەکان کراون.
