کوێت سەرکۆنەی هێرشەکانی ئێران بۆ سەر هه‌رێمی كوردستان دەکات
دیجیتال میدیای سپیده
حکوومەتی کوێت سەرکۆنەی ئەو هێرشە مووشەکییەی کرد کە ئێران پێرێ کردییە سەر بارەگاکانی پارتی دیموکراتی کوردستانی ئێران (حدکا) و کۆمەڵە لە هەرێمی کوردستانی عێراق.
وەزارەتی دەرەوەی کوێت راگەیەندراوێکی سەبارەت له‌وباره‌یه‌وه بڵاو کردەوە.
لە راگەیەندراوەکەدا سەرکۆنەی هێرشەکە کراوە و جەخت لەوە کراوەتەوە کە کوێت لەگەڵ عێراق لە هەماهەنگیدایە و سەرجەم ئەو هێرشانە رەتدەکەنەوە کە هەڕەشە لە ئاسایش و سەقامگیریی عێراق دەکەن.
وەزارەتی دەرەوەی کوێت لە راگەیەندراوەکەدا سەرەخۆشی لە کەسوکاری ئەو کەسانە کردووە کە گیانیان لەدەستداوە و هیوای زوو چاکبوونەوەی بۆ بریندارەکان خواستووە.
- چوارەم هێرش لە ماوەی دوو مانگی رابردوودا
رۆژی دووشەممە ١٤ی تشرینی دووەمی ٢٠٢٢، ئێران هێرشی مووشەکی کردبوویە سەر هه‌رێمی كوردستان و سوپای پاسدارانی ئێران کردنە ئامانجی بارەگاکانی حدکا و کۆمەڵەی راگەیاندبوو.
لەو راگەیەندراوەدا کە لەلایه‌ن وەزارەتی تەندروستیی حکوومەتی هەرێمی کوردستانەوە بڵاو کرابوویەوە، ئاماژە بەوە کرابوو کە هێرشەکە گیانلەدەستدانی کەسێک و برینداربوونی هەشت کەسی لێکەوتووەتەوە.
ئەمە چوارەم هێرش بوو لە ماوەی دوو مانگدا بکرێتە سەر ناوەندی حزبه‌كانی نه‌یاری تاران لە هه‌رێمی كوردستان.
ئێران لە ٢٤ی ئەیلوولدا ناوەندەکانی کۆمەڵە و حدکای تۆپباران کردبوو.
سوپای پاسدارانی ئێران، لە کاتێکدا خۆپیشاندان و ناڕەزایەتییەکانی دوای گیانلەدەستدانی مەهسا ئەمینی لە وڵاتەکە بەردەوامە، کۆمەڵە و حدکا بەوە تاوانبار دەکات کە گرووپی چەکداری و بڕێکی زۆر چەکیان بە مەبەستی ئاژاوەگێڕی بۆ ناوچە سنوورییەکان ناردووە. ئێران لە کۆتا رۆژەکانی مانگی ئەیلوولیش دوو جار هێرشی کردە سەر پێگەکانی ئەو دوو گرووپە چەکدارییە.