هەواڵی کوردستان ئێستا

لە تارانی پایتەختی ئێران، چێشتخانەیەک بەهۆی بڵاوکراوەیەکی لە تۆڕی کۆمەڵایەتی دژ بە وڵاتەکەی لەبارەی یاری تۆپی پێی نێوان ئێران-ئینگلتەرا، کۆتایی بە کارکردنی هێنرا.

بەپێی هەواڵێکی ئاژانسی هەواڵی کرێکارانی ئێران (ILNA)، چێشتخانەیەکی شەقامی شەریعەتی کە یەکێکە لە قەرەباڵغترین شەقامەکانی تاران، لە هەژماری ئینستاگرامەکەی بڵاوکراوەیەکی سەبارەت بە یاری نێوان ئێران و ئینگلتەرا بڵاوکردووەتەوە کە لە پەراوێزی یارییەکانی جامی جیهانی فیفا ٢٠٢٢ لە قەتەر ئەنجام درا.

ئەو چێشتخانەیە کە ناوەکەی بڵاونەکراوەتەوە، لە هەژماری خۆی پشتیوانی لە هەڵبژاردەی ئینگلتەرا کردووە و رەخنەی لە مارشی نیشتمانی ئێران گرتووە. بەو هۆیەشەوە کارکردنی راگیراوە.

یاریزانانی هەڵبژاردەی تۆپی پێی ئێران، لە یەکەم یارییاندا لە چوارچێوەی جامی جیهانی فیفا، مارشی وڵاتەکەیان نەگوتەوە و پشتیوانیان لە خۆپیشاندانەکانی مەهسا ئەمینی کرد کە زیاتر لە دوو مانگە لە وڵاتەکەیان بەردەوامە.