هه‌واڵگریی ئێران ده‌ستگیركردنى چوار تیمى مۆسادى ئیسرائیلى راگه‌یاند
وه‌زاره‌تی هه‌واڵگریی ئێران رایگه‌یاند: چوار تیمی ئۆپه‌راسیۆنیان ده‌ستگیر كردووه كه سه‌ربه ئاژانسی مۆسادى ئیسرائیلین و له ئاماده‌كاریدابوون بۆ ئه‌نجامدانی كرده‌ی تیرۆریستی له میانی خۆپیشاندانه‌كانی ئێران
ئاژانسی هه‌واڵیی ته‌سنیم له‌مباره‌یه‌وه راگه‌یه‌ندراوێكی وه‌زاره‌تی هه‌واڵگریی ئێرانی بڵاو كردووه‌ته‌وه تێدا هاتووه چوار تیمی سیخوڕى سه‌ربه مۆسادى ئیسرائیلیان ده‌ستگیركردووه ده‌یانویست به كه‌ڵك وه‌رگرتن له‌و راپه‌ڕینانه‌ی له چه‌ند هه‌فته‌ی رابردوودا له ناوچه جیا جیاكانی وڵات روویان دا، له رێگای ئاراسته‌كردنی تیمه ئۆپه‌راسیۆنه‌كانییه‌وه هه‌وڵیاناداوه ژماره‌یه‌كی زۆر كرده‌ی تیرۆریستی ئه‌نجام بده‌ن به‌ڵام ته‌واوی تیمه‌كان به‌ر له ئه‌نجامدانی هه‌ر جۆره چالاكییه‌كی تیرۆریستی ده‌ستگیر كراون
له راگه‌یه‌ندراوه‌كه‌دا هیچ زانیاری نه‌دراوه له‌باره‌ی ژماره‌ی كه‌سه ده‌ستگیركراوه‌كان و ناسنامه‌كانیان.