هۆشدارییه‌كى نێوده‌وڵه‌تى بۆ عێراق كه‌ته‌نها پشت به‌داهاته‌كانى نه‌وت نه‌به‌ستێت
دیجیتال میدیای سپێده
بانكى نێوده‌وڵه‌تى هۆشدارى ده‌داته عێراق كه‌ته‌نها پشت به نه‌وت نه‌به‌ستێت وگرنگى به‌كه‌رتى دیكه بدات بۆ به‌ده‌ست هێنانى داهاتى زیاتر.
سه‌لیم روحانا، به‌رپرسى به‌رنامه‌ى گه‌شه‌پێدان له‌بانكى نێوده‌وڵه‌تى رایگه‌یاندوه: له‌گه‌ڵ ئه‌و گۆرانكارییانه‌ى كه‌له‌جیهاندا هه‌ن، بانكى نێوده‌وڵه‌تى هیچ زانیاری وبه‌دواداچوونێكى دیاریكراوى نیه له‌سه‌ر نرخه‌كانى نه‌وت، ئه‌وه‌ش به‌هۆى ئه‌وه‌ى جیهان به‌ره‌و ئابووری دیكه ده‌چێت كه‌كه‌مترین پاشماوه‌ى كاربوونیان هه‌بێت.
روحانا راشیگه‌یاند: جیهان زیاتر پشت به‌وزه‌ى خاوێن ده‌به‌ستێت له‌خۆر وهه‌وا، وگوتى: بۆیه ناكرێت عێراق ته‌نها پشت به داهاته‌كانى نه‌وت ببه‌ستێت، كه‌پێده‌چێت نزمبوونه‌وه‌ى داهات به‌خۆیه‌وه ببینێت.
ئاماژه‌ى به‌وه‌شكرد: به‌پێى راپۆرتى كه‌شو هه‌وا وگه‌شه‌پێدان كه‌به‌م دواییانه ده‌رچووه، جه‌ختى له‌وه كردۆته‌وه كه‌له‌سه‌ر عێراق پێویسته وه‌به‌رهێنانى گه‌وره بكات بۆ ئه‌وه‌ى له‌گه‌ڵ دۆخى گۆرانكارییه‌كانى كه‌ش وهه‌وا بگونجێت به‌تایبه‌ت له‌بوارى كشتوكاڵى دا.
راشیگه‌یاند: ئه‌گه‌ر بێت وعێراق وزه‌ى جێگره‌وه به‌كاربێنێت وه‌ك خۆر وهه‌وا، به‌هاتنى ساڵى 2040 عێراق ده‌توانێت زیاتر له 31 %ى وزه‌ى جێگره‌وه به‌رهه‌م بێنێت، وئه‌مه‌ش وه‌به‌رهێنانێكى گه‌وره‌ى پێویسته.
