لە عێراق ناڕەزایەتی بەرامبەر سوتاندنی قورئان لە سوید نیشاندرا
دیجیتال میدیای سپێده
لە بەغدای پایتەختی عێراق، ناڕەزایەتی بەرامبەر سوتاندنی قورئانی پیرۆز لە ستۆکهۆڵمی پایتەختی سوید، نیشاندرا.
ژمارەیەک خۆپیشاندەر لەبەردەم باڵیۆزخانەی سوید لە بەغدا کۆبوونەوە و ناڕەزایەتییان لەبەرامبەر سوتاندنی قورئانی پیرۆز لەلایەن سەرۆکی پارتی رێڕەوی راست-ی راستڕەوی توندئاژۆ، راسموس پالودان لەبەردەم باڵیۆزخانەی تورکیا لە ستۆکهۆڵم، دەربڕی.
خۆپیشاندەران، بەدەنگی بەرز دەیانگوت "هوموومان قوربانی ئیسلامین" و "بژی عێراق" و درووشمی "با ئەوانەی قورئانی پیرۆزیان سوتاندووە سزا بدرێن"، "نەخێر بۆ حکوومەتی سوید"، "سوتاندنی قورئانی پیرۆز لە سوید تاوانێکی گەورەیە، نابێت لە بەرامبەر ئەمە بێدەنگ بین" و “با باڵیۆزخانەی سوید لە بەغدا دابخرێت"یان بەرزکردبوویەوە.
هاوکات رێگە بە گرووپێک خۆپیشاندەر نەدرا کە هەوڵیاندا بچنە نێو باڵەخانەی باڵیۆزخانەکەوە.
چەند خۆپیشاندەرێک لە کاتی بڵاوەپێکردنیان لەلایەن هێزە ئەمنییەکانەوە برینداربوون و ڕێوشوێنە ئەمنییەکانی دەورەبەری باڵیۆزخانەی سوید توندکران.