نێچیروان بارزانی دووپات لە ئارەزوو سوودگرن هەرێم کوردستان لە پڕۆژەیل چینی لە عراق کەێد
شەفەق نیوز/ نێچیروان بارزانی سەرۆک هەرێم کوردستان، ئمڕوو دوووشەممە، دووپات لە ئارەزوو سوودگرن لەو پڕۆژەیلە کرد ک کۆمپانیایل چینی لە عراق جیوەجی کەن، لە وەختیگ جیوەجیکردن سیستەم فیدڕاڵی وە رییگ ئەرا چارەکردن گرفتەیل ناوبەین بەغداد و هەولێر و وەدەسهاردن ئارامی و قایمکردن ئابووری ناسان.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: بارزانی پیشوازی لە شاندیگ لە کۆمار چین جەماوەری وەسەرۆکایەتی زوو روی جیگر وەزیر لە فەرمانگەی پەیوەندیەیل دەیشتەکی لە دەسەی ناوەندی حزب شیوعی چین کرد، وە ئامادەبوین وەرپرسەیلیگ لە بەغداد و وەرپرسەیل قونسوڵخانەی گشتی چین لە هەولێر، و باس لە باوەت پەیوەندیەیل وڵات چین وەگەرد عراق و هەرێم کوردستان کریا، هەمیش رەوشەیل عراق و سەختیەیل نوای، و پەیوەندیەیل هەولێر و بەغدا و گفتوگۆ وەخاتر چارەکردن گرفتەیل گیرهاتگ ناوبەینیان.
هەردوگ لایەنەگە دەسنشان کردن ک وەگڕنگی نووڕنە پەیوەندیەیل وڵات چین وەگەرد عراق و هەرێم کوردستان و ئومید قایمکردن بنەمایل هاوکاری ناوبەینیان دیرن، تایبەت لە چین بازرگانی و کەلتوری، و لەی باوەتە باس لە کار و گورجی کۆمپانیایل چینی لە عراق کریا.
لەباوەت گرفتەیل گیرهاتگ ناوبەین هەولێر و بەغدا، بارزانی دووپات کرد ک جیوەجیکردن سیستەم فیدڕاڵی لە عراق لە بنەمای دەستوور ئارامی وەدەس تیارێد و هاز کەرت ئابووری زیای کەێد، دووارە ئارەزوو هەرێم کوردستان لە سوودگرن لەو پڕۆژەیلە دووپات کرد ک وڵات چین لە عراق جیوەجی کەێد.
پەیوەندیەیل عراق و هەرێم کوردستان، وەگەرد دەوڵەتەیل هاوسا و دەوڵەتەیل ناوچەگە، و جەنگ دژوە تیرۆر و نووترین نووەوبویەیل لەناوچەگە وەشیوەیگ گشتی، باس ناو ئەو دیدارە بوین.
