هەڵمەت وەشوینکەفتن ناودیارەیل سۆشیال میدیا رخیگ لە دووچەوەکی دروس کەێد
لەناو مانگ شوبات، وەزارەت ناوخوەیی و ئەنجومەن دادوەری باڵا دەسکردنە هەڵمەتیگ تا بکەفنە شوین ئەوانەگ وە بڵاوکرد چشت گەن لەبان سۆشیال میدیا توومەتبار کریانە، و لەبان ئەوە یادداشتەیل دەسگیرکردن و بڕیار زیندانیکردن لەبان حەسەن سچمە، و داڵگ فەهەد، و عەسەل حوسام، و سەعلوسە، و کەسەیلیگتر دەرچگ.
لیوا خالد ئەلمحەنا قسەکەر وەزارەت ناوخوەیی دووپات کەێد ک هەڵمەتەگە لەبان خاوەن ئەو باوەتەیلە جیوەجی کریەێد ک چشت بەد و ناشرین بڵاو کەن، و هەڵمەتەگە وەماوەی کوڵیگ رەسیە ئامانج خوەی، ک فرە لەوانەگ چشت ناشرین بڵاو کەن پۆستەیلیان سڕینەو، و لە خود وەختەگە، وەزارەتەگە توەنست ئاواز و شیوەی بڵاوکردن رێک بکەێد وەشیوەیگ نەڕەسێدە ئاوڕویچگن و شەرمی، یا باوەتەیل گەن، یا ئەوانەگ وەگورەی رسوومەیل کۆمەڵگا نیین.
محەنا ئەرا ئاژانس شەفەق نیوز دیاری کەێد ک سۆشیال میدیا جویر چشتیگ راسی لەبان کۆمەڵگای عراق چەسپیاگە، ئەراوە گرنگە لە چشتەیل ناشرین پاکەو بوود ک رەوشت گشتی شکنێد، و هەڕەشە لەبان نەوەیلمان دروس کەێد، و شکانن ئاشکراس لەبان بنچینەی یاسای سزادان عراقی شمارە ١١١ ئەرا ساڵ ١٩٦٩.
بیتام و بیەنمەک
سەعدون ساعدی گورانیچڕ جەماوەری، وەیجویرە باس بەشیگ لە هونەرمەنەیل کەێد، لە ئەنجام نەوین یاسا لەبان سۆشیال میدیا، ک ئویشێد: خوەزگا ئی هەڵمەتە لە زەویەو بویاتاد، چوینکە هونەرمەنەیلیگ و ناودیارەیلیگ هەس، بیتامی بیەنمەک دیرن، ئەراوە هەمیشە داوای ئیجویر هەڵمەتیگ کردمە.
ساعدی ئەرا ئاژانس شەفەق نیوز دووپات کەێد ک من هامە گەرد هەڵمەت وەزارەتەگە لەبان بڵاوکردن چشتەیل ناشرین.
هوشداری لە جیوەجیکردن
هادی جلو سەرۆک رەوانگەی ئازادیەیل رووژنامەوانی، ئویشێد: ئەو ریکارەیلە ک وەلایەن دەسەی بڵاوکردن چشتەیل ناشرین لە وەزارەت ناوخۆ جیوەجی کریەن، چشتیگ پیشکەفتگە دویای ئەو ناشرینیە لە سیامیلیگ لەبان فەیسبووک و تیک تۆک و ئەو ماڵپەرەیل سۆشیال میدیا، و هەمیش رەفتارەیل ناو یانەیل شەوانە و شوینەیلیگتر.
جلو لە قسەیلی ئەرا ئاژانس شەفەق نیوز ئویشێدیش؛ ئیمە نیەخوازیمن ئی ریکارەیلە وە دووچەوەکی جیوەجی بکریەن، ک هاتێ ئەرا کارەیل سیاسی یا رخبردن چالاکوانەیل یا روشنهویرەیل وەکاری بارن، یا ئەوانەگ رەخنەی سیمایل دەسەڵاتی و گەندەڵی گرن، و داوای گرنگی هەستیاری لە جیوەجیکردن ئەو ریکارەیلە کرد، و وەرجە جیوەجیکردن بایەتە هوشدار ئەو کەسەیلە بکەن و دەرفەت وازهاوردن لەو رەفتارەیلە وەپیان بیەن تا چشتەیل ناشرینیان بسڕنەوە و لە بانان دووارەی نەکەن.
سەرۆک رەوانگەی ئازادیەیل رووژنامەوانی هەمیش داوای گرنگی دروسکردن دەسەیگ لە پسپۆڕەیلیگ لە دادوەری و رووژنامەوانی و راگەیانن کەێد، تا دیاری بکەن کام باوەت لەبان سۆشیال میدیا بەدە، چوینکە گرنگە مقەیتی سام کۆمەڵگا و رسوومەیل رەوشتی و زانست و کەلتوور بکریەێد، و لە جیوەجیکردن ئەو ریکارەیلە وەرەو کار دویریگ نەکەفن.
سزای بڵاوکردن چشت ناشرین
عەلی تمیمی پسپۆڕ یاسایی دیاری کەێد ک یاسای سزادان لە ماوەی ٤٠٣ سزای دوو ساڵ زیندانی یا باج پویل لەبان بڵاوکەر چشت گەن دەێد، وتیش: عراق داناین یاسای دژە تاوانەیل ئەلیکترۆنی خوازێد، تا بوودە چارەیگ لەنوای ئی تاوانەیل باوە.
لەلایەن چەودیاریکردن لەبان سۆشیال میدیا، تمیمی لە قسەیلی ئەرا ئاژانس شەفەق نیوز نووڕێد ک بایەتە بەشیگ تایبەت لە دەسەی راگەیانن و پەیوەندیەیل دروس بوود، تا بوودە جویر راسەوکردنیگ ئەرا یاسای ٦٥ ئەرا ساڵ ٢٠٠٤، و ئی بەشە بڕیگ لە پسپۆڕەیل یاسا و راگەیانن لەناوی بوود، تا چەویان وەدیار بڵاوکردن بوود، و ئەگەر تاوانیگ لەناوی بوود، هەواڵەی دادگا بکریەێد، و ئی چەودیاریە وەلایەنەیلیگ ئەمنی بوسیەێدەو، تا زانیاری لەلیان بوەێد.
لەی ماوەی دویایی، پارچە ڤیدیۆ وەلایەن کەسەیلیگ وەناوبانگ لەبان سۆشیال میدیا بڵاو بوی، ک چشتەیل یەک و ناشرین لەناوی پیشکەش کەن، ک وەگەرد کەلتور گشتی و رسوومەیل کۆمەڵگا نیەگونجیەێد.
