نێچیروان بارزانی وەگەرد باڵیۆز ئیتالیا باس گەشەپیدان پەیوەندیەیل وەرد رۆما کەێد
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: نێچیروان بارزانی سەرۆک هەرێم کوردستان، ئمڕوو پیشوازی لە ماوریتسیۆ کریکانتی باڵیۆز ئیتالیا لەلای عراق کرد، و باس گەشەپیدان پەیوەندیەیل هەرێم کوردستان و عراق وەرد ئیتالیا کردن.
بەیاننامەگە وتیش: سەرۆک هەرێم کوردستان سوپاس لە ئیتالیا کرد ئەرا ئەو پاڵپشتیکردنە ک لە عراق و هەرێم کوردستان کردگە، و هەمیش باس کەشوهەوای گونجیاییگ لەناوبەین بەغداد و هەولێر کرد، و تا ئیسە گامەیل حکومەت فیدڕاڵ جی ئومیدن.
سەرۆک هەرێم کوردستان هەمیشە دووپات کرد ک بەغداد هاوبەشیگ سەرەکیە ئەرا هەرێم کوردستان، و رییگتر لەنوای هەردوگ لایەنەگە نییە، مەگەر تەنیا چارەسەکردن گرفتەیلە.
لەلای خوەییش؛ باڵیۆز ئیتالیا چەوکەفتنی وەگەرد سەرۆک هەرێم کوردستان لە کۆنگرەی میونخ لە مانگ شوبات وە ئەرێنی دانا، و دووپات کرد ک چارەکردن گرفتەیل ناوبەین هەولێر و بەغدا ئەوەسا هیلێد کۆمەڵگای ناودەوڵەتی روی وەرەو عراق و هەرێم کوردستان زیاتر بکەن، و دەسمیەتی لە زیایبوین بەرهەمهاوردن بیگانە دەێد.
بەیاننامەگە وتیش: هەردوگ لایەنەگە لەناو ئەو دیدارە ک قونسڵ ئیتالیا لە هەرێم کوردستان ئامادەی بوی، باس ئەنجامدان کار و چالاکیەیل ئیتالیا لە عراق و هەرێم کوردستان کردن، هەمیش باس رەوش ناوچەکە وەگشتی و چەن باوەتیگ خاوەن گرنگی لەلای هەردوگ لایەنەگە کریا.
