سەرکۆماری عێراق داوا دەکات ئەنجوومەنی نوێنەران پەلە بکات لە پەسەندکردنی یاسای نەوت و غاز
سەرکۆماری عێراق، عەبدولـلەتیف رەشید داوای لە ئەنجوومەنی نوێنەران کرد کە پەلە بکات لە پەسەندکردنی یاسای نەوت و غاز و رایگەیاند کە بە پەسەندکردنی یاساکە، کێشەکانی نێوان ھەولێر و بەغدا چارەسەر دەبن.
نووسینگەی راگەیاندنی سەرۆکایەتی کۆماریی عێراق لە راگەیەندراوێکدا ئاماژەی بەوەداوە کە عەبدولـلەتیف رەشید لەگەڵ سەرۆک و ئەندامانی لیژنەی نەوت و غاز و سامانە سروشتییەکان لە ئەنجوومەنی نوێنەران کۆبووەتەوە.
راشیگەیاندووە کە لە میانی کۆبوونەوەکەدا، سەرکۆماری عێراق داوای کردووە کە پەلە بکرێت لە پەسەندکردنی یاسای نەوت و غاز، بەشێوەیەک کە زامنی ئەوە بکات عێراقییەکان بە یەکسانی و دادپەروەریی سوودمەندبن لە سامانی نیشتمانیی و رایگەیاندووە کە پەسەندکردنی یاساکە گرنگە بۆ چارەسەرکردنی کێشە ھەڵپەسێردراوەکانی نێوان حکوومەتی فیدراڵیی و حکوومەتی ھەرێمی کوردستان.
عەبدولـلەتیف رەشید جەختی کردووەتەوە لەسەر ئەوەی کە پێویستە پاڵپشتی لە پیشەسازی نەوت بکرێت، بەتایبەتی لە پڕۆژەکانی وەبەرھێنان لە کەرتەکانی پیشەسازیی غاز و پاڵاوتنی نەوت، ھەروەھا چارەسەرکردنی ئەو ئاستەنگانەی کە رووبەڕووی دەبنەوە.
ھەروەھا سەرکۆماری عێراق دووپاتی کردووەتەوە کە پێویستە، پلانی باش بۆ جێبەجێکردنی پڕۆژەکان بە ئامانجی پەرەپێدان و باشترکردنی ئاستی بەرھەمھێنانی نەوت لە وڵاتدا دابنرێت، ھەروەھا کار بکرێت بە ئامانجی دۆزینەوەی میکانیزمێکی گونجاو بۆ سوود وەرگرتن لە سامانی نەوت و غاز.
