هەواڵی کوردستان ئێستا

شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، وەبوونەی جەژن قیامەت پیرووزبایی لە مەسیحیەیل کرد.

سەرۆک نێچیروان بارزانی لە بەیاننامەیگ رەسیە ئاژانس شەفەق نیوز وت: وە گەرمی فرەیگ پیرووزبایی لە خوەشک و برا مەسیحیەیل لە هەرێم کوردستان، عراق و جەهان کەم، وەبوونەی جەژن قیامەت هەزرەت مەسیح (ع)، ئومید جەژن و پشوو کپ و خوەشیگ ئەرایان خوازم، و داوای سەرکەفتن ئەرایان کەم.

وتیش: لەی جەژن پیرووزە، دووپات لەبان ئەوزەڵکردن کەلتور وەیەکەوژیان ناوبەین پیکاتەیل ئاینی و بنچینەیی لە کوردستان کەیمن، ک روییگ فرە گرنگە ئەرا ناسنامەی کوردستان و جی شانازیە. 

سەرۆک هەرێم کوردستان وتیش: دڵنیای گشت خوەشک و برا مەسیحیەیل و گشت پیکاتەیل کەیمن ک ئیمە هەمیشە هەر مقیەتیکەر ئی کەلتورە و ماف و ئازادییان مینیمن.