هەواڵی کوردستان ئێستا

شەفەق نیوز/ کەیوانوویگ ئەمریکی، کەفێدە وەر توومەتەیل نوویگ وە دزیکردن بانگ، ک وەرجەیە دوو گلە وەخود تاوانەگە توومەتبار کریاگە.

رووژنامەی  "كانساس سيتی ستار" وت: بونی گۆتش وە کەفالەی ٢٥ هەزار دۆلار زیندان کریا، دویای توومەتبارکردنی وە دزیکردن یا تەقەلای دزیکردن لە دەزگایگ حکومەتی.

دەسەڵاتەیل وتن: ئەو ژنە لە تەمەن ٧٨ ساڵە، پەیامیگ دادە دەس خانمە فەرمانبەر بانکەگە ک ئویشێد: نیەخوازم رخد بووەم، ئەوەیش لە دویاترین دزیکردن لە ویلایەت میسوری ئەمریکا.

بەڵگەیل دادگا لەی باوەتە نشان دان ک پەیام کەیوانووەگە ئویشێد: هاتمەسە دزیکردن، ١٣٠٠٠ دەنگ پویل کانزایی بویچگ خوازم، سوپاس، نیەخوازم رخد بووەم.

وتنیش؛ کامیرایل ناو بانکەگە نشان دەن هەنای ژنەگە وەدەس کوتێدە بان مێزەگە و خوازێد وەزوی پویلەگە وەپی بیەن.

وتنیش؛ بوو مەی لەو ژنە هاتگە، و پویلیش لەناو ماشینەگەی رشیاگە.

وەچەودیەیل وتن: ژنەگە دڵنگ بوور پووشاوێد، و دەسکیش و چەویلکەی سیا و ماسکیگ رەنگ سیا پیچاگە. 

دویای ئەوە ک پویل کەفتە دەس کەیوانوو، پولیس کەفتە مینەی شوین و نوینی، تا ئەفسەرەیل کردنەی دی، و ماشینەگەی وسانن.

 گۆتش وەرجەیە دوو گلە وە توومەت دزیکردن بانک تاوانبار کریاگە، یەکەمیان لە ساڵ ١٩٧٧ لە کالیفۆڕنیا، و دویەمەگە لە ساڵ ٢٠٢٠ لە شار کانساس بویە.