بارانبارین لە ھەرێمی کوردستان دەستی پێ کردەوە و کەشناسیش هۆشداری داوە
- بەپێی پێشبینییەکانی وەزارەتی گواستنەوە و گەیاندنی حکوومەتی ھەرێمی کوردستان، ئەمڕۆ چوارشەممە بارانێکی زۆر لە ھەرێمی کوردستان دەبارێت و ھۆشداریشی لەبارەی ئەگەری دروستبوونی لافاو داوە.
درەنگانی شەوی رابردوو، شەپۆلێکی بارانبارین ھەرێمی کوردستانی گرتەوە و تا بەرەبەیان بەردەوام بوو، بەڵام لە کاتەکانی بەیانییدا، جارێکی بارانبارین دەستی پێ کردەوە.
ماوەی دوو رۆژە، بەشی پێشبینییەکانی کەشوھەوا لە وەزارەتی گواستنەوە و گەیاندنی حکوومەتی ھەرێمی کوردستان ھۆشداریداوە لە روودانی لافاو و بۆ ئەم مەبەستەش لیژنە پەیوەندارەکان چەندین رێنماییەکان دەرکردووە.
شەوی رابردوو، پارێزگار و بەشێک لە وەزیرە پەیوەندارەکان بەشێوەیەکی ئۆنڵاین کۆبوونەوە بۆ بڕیاردان لەسەر دەوامی دامودەزگاکانی ھەرێمی کوردستان بەھۆی بارانبارینەوە و دواتر بڕیاردرا کە دەوام ئاساییە و دەسەڵات درا بە بەڕێوەبەری زانکۆکان و پەروەردەکان بۆ ئەوەی لە کاتی پێویستدا بڕیار بدەن.
پارێزگاری ھەولێر، ئومێد خۆشناو رایگەیاند کە لەماوەی ساڵی رابردوودا، کۆمەڵێک رێوشوێن بۆ بەرگرتن لە لافاو گیراوەتەبەر و تا ئێستا بارانێکی زۆر باریووە و ھیچ رووداوێکی نەخوازراو لە ھیچ جێگایەک رووینەداوە و تەواوی تیمەکانی حکوومەت و فەرمانگە خزمەتگوزارییەکان و ھێزی پێشمەرگە و دەزگاکانی ئەمنیش لە حاڵەتی ئامادەباشیدان.
زانکۆی چەرموو بەھۆی نالەباری کەشوھەواوە پشووی فەرمیی لە زانکۆکە راگەیاند، ھاوکات لەسەر ئاستی عێراقیش ھەریەک لە پارێزگارەکانی نەینەوا و کەرکووکیش بەھۆی نالەباری کەشوھەواوە، پشووی فەرمییان لە پارێزگاکە راگەیاند.
بەپێی پێشبینییەکانی وەزارەتی گواستنەوە و گەیاندنی حکوومەتی ھەرێمی کوردستان، ئەمڕۆ چوارشەممە بارانێکی زۆر لە ھەرێمی کوردستان دەبارێت و ھۆشداریشی لەبارەی ئەگەری دروستبوونی لافاو داوە.
