هەواڵی کوردستان ئێستا

دیجتاڵ میدیای سپێده‌

سەرۆکوەزیرانی عێراق، محەمەد شیاع سوودانی رایگەیاند، ئەنفال قێزەونترین ستەم و تاوانە کە رژێمی بەعس دژبە گەلی کورد ئەنجامیدا کە هیچ رژێمێک تاوانی بەم شێوەیە لە رق وکینە و رەگەزپەستی لە دژی هاووڵاتییانی خۆی ئەنجامی نەداوە.

محەمەد شیاع سوودانی لە یادی شاڵاوەکانی ئەنفال دژبە گەلی کورد، پەیامێکی بەهەر سێ زمانی عەرەبی، کوردی و ئینگلیزی بڵاوکردەوە.

لە پەیامەکەی سەرۆکوەزیرانی عێراقدا هاتووە "بەبێ دەنگی و رێزگرتن و غەمگینیەوە، لەم رۆژانەدا پێکەوە یادی پرۆسەکانی تاوانی ئەنفال لە دژی گەلی کوردی خۆشەویست دەکەینەوە کە قێزەونترین ستەم و دوژمنکاری بوو رژێمی دیکتاتۆری بەعسی ئەنجامیدا کە هیچ رژێمێک تاوانی بەم شێوەیە لە رق وکینە و رەگەزپەستی لە دژی هاووڵاتییانی خۆی ئەنجامی نەداوە".

سوودانی راشیگەیاندووە، تاوانباران سزای خودا و یاسایی خۆیان وەرگرت و بەرگی شەرمەزارییان بۆ هەتا هەتایی لەبەر کرد، بەڵام بەهۆی ئەو تاوانە کۆمەڵکوژییە دژبە مرۆڤایەتییەوە هێشتا ئازار و حەسرەت لەناو دڵ و دەرووندا هەر ماوە.

سەرۆکوەزیرانی عێراق ئاماژەی بەبەهێزی نێوان پێکهاتەکانی عێراق کردووە و رایگەیاندووە "گەلەکەمان ئەمڕۆ لە رەوشێکی بەهێزتردایە و بەڕیزێکی تۆکمە و توانا و هاوبەندیەکی پتەوتر لەنێوان پێکهاتە جیاوازکانییدا لەسەر پێی خۆی وەستاوە".

لە بەشێکی دیکەی پەیامەکەی محەمەد شیاع سوودانی هاتووە "گەلەکەمان هەموو پێکەوە شەڕی دیکتاتۆرییەتی کرد و بۆ هەمیشە لەگۆڕی نا، هەروەها هەموو ئەوانەیشی لە گۆڕنا کە هەڵگری گوتاری هاندان و جیاکاری و دروستکردنی جیاوازییەکان بوون. گەلەکەمان کە لە تاوانەکانی ئەنفال و جینۆساید و ستەم و بێ مافکردن رزگاری بووە و لە دژی ستەمکاری خەباتی کردووە و کاروانی شەهیدانی لەسەر رێگای ئازادی کردە قوربانی، ئیرادەی خۆی بۆ بنیاتنانی ئایندەیەکی ئارام دیاری کردووە کە تێیدا هەموو عێراقییەکان بە رێز و شکۆمەندانەوە لە خاکەکەیاندا بژین".

لە کۆتایی پەیامەکەیدا سەرۆکوەزیرانی عێراق دەڵێت "ئەمڕۆ ئەم یادە پڕ لە ئازارە دەکەینەوە وەک دەستپێک بۆ نوێکردنەوەی پەیمانی کار و بیناکردن و بەخشین تاوەکو ببێتە هاندەرێک بۆ نەوەکانی کە شایەتحاڵی تاوانەکە بوون و ئەوانەی بەیانبینووە، پێکەوە دەست لەناو دەست و بە برایەتی لەپێناو عێراقێک کە تاوانەکانی کۆمەڵکوژی و گۆڕی بەکۆمەڵ تیایدا دووبارە نەبێتەوە".