هەواڵی کوردستان ئێستا

شەفەق نیوز/ دەسەی هەرەزوەزی لە خانەقین، ئمڕوو شەممە، دەسکردە هەڵمەتیگ خوەیوەخشی ئەرا دارناین لە دەریاچەی ئەڵوەن، وەگەرد ساڵیاد کارەسات ئەنفال بەدناو، ک نزیکەی ٢٠٠ هەزار هاووڵاتی کورد وەدەس رژیم وەرین لەلی بوینە قوربانی.

سەلام عەبدوەلڵا ئەندام دەسەگە ئەرا ئاژانس شەفەق نیوز وت: دەسەگەی وە بەشداریکردن چالاکوان و خوەیوەخشەیل، دەسکردنە دارناین لە کنار دەریاچەی ئەڵوەن، ک یە ١٠ ساڵە وەپشتگووش خریاگە، وەبی هویچ پاکەوکردنیگ، هەرچەن شوینیگ گرنگە لە خانەقین. 

دووپات کرد لە داناین ١٠٠ دار لە کنار دەریاچەی ئەڵوەن جویر پەیامیگ ئەرا رزگارکردن دەریاچەگە لە چەوەڕی و پشتگووشخستن.

وتیش: هەڵمەتەگە جویر یادکردنیگ ئەرا کارەسات ئەنفال بوی، ک رژیم وەرین وە جینۆسایدکردن ١٨٢ هەزار هاوڵاتی کورد وەسێدارەدان و کۆمەڵگە قەورسانی و لە ژیر شکەنجە و وەچەک کیمیایی جیوەجیی کرد.

دویەکە جمعە، ١٤ی نیسان، سی و پەنجەمین ساڵیاد جینۆسایدکردن ئەنفال بوی، ک رژیم عراقی وەرین جیوەجیی کرد، و دەیان هەزار لە گەل کورد بیگوناه لە مەدەنی بیچەک، لەلی بوینە قوربانی، و هەمیش هەزاران ئاوای لەناوی خاپوور کرد.

 ئەنفال لە ساڵ ١٩٨٦ دەسوەپی کرد، و لویتکەگەی رەسیە ساڵ ١٩٨٨، و تا ساڵ ١٩٨٩ وەردەوام بوی.