بازاڕەیل سلێمانی وە ئامادەکاری ئەرا جەژن پڕ لە بسینەیل بوون.. وینە
کامیرای ئاژانس شەفەق نیوز لەناو بازاڕەیل شارەگە گەردێد و نووڕیە ئامادەکاری مەردمەگە ئەرا پیشوازیکردن لە جەژن رەمەزان، و قسە و رایان توومار کرد، ک دووپات کردن ئی جەژنە هەر جویر جەژنەیل جارانیە و دڵیان قرچێد وە خوەشی و شادی بوەنەی سەر.
هاووڵاتی کارزان ئەحمەد ئەرا پەیامنێر ئاژانس شەفەق نیوز وت: ئامادەکاری ئەرا پیشوازیکردن لە جەژن رەمەزان گورجە، ک هاتیمنەسە بازاڕ سلێمانی تا لە دویاترین رووژەیل مانگ رەمەزان چشت بسینیمن، ک ئی جەژنە تایبتمەنی خوەی دیرێد لەلای موسەڵمانەیل وەتایبەت رووژەوانەیل، ک وەگورەی شایستەی ئی رووژە بایەتە ئاهەنگ وەپی بکریەێد.
و دیاری کرد، هەمیشە ئامادەکاری ئەرا جەژن فرە زوی دەسوەپی کەێد، ک روی کەیمنە بازاڕ تا چشتەیل جەژن لە کەرەستەیل خوەراک و دڵنگ مناڵەیل تەواو بکەیمن، وەرجەیەگ بازاڕەگە قەرەباڵغەو بوود.
وتیش: هەرچەن ئیمە خەڵک دەربەندیخانیمن، وەلێ تیەیمنە بازاڕ سلێمانی ئەرا چشت سەنین، چوینکە ئەو چشتەیلە لەی بازاڕە هەس لە شوینیگتر نییە، وەتایبەت کەرەزان و پڕتاڵ ک نرخیان لەیرا ئەرزانترە.
لەلایەن حکومەتی، سۆران غەفور وەڕیەوبەر چەودیاریکردن بازرگانی لە سلێمانی ئەرا ئاژانس شەفەق نیوز ئویشێد: دەزگایل حکومەتی لە چەودیاریکردن بازرگانی و ئاسایش ئابووری و دەسەیل هاوبەش لە قایمقامیەت سلێمانی، پلانیگ وەرجە جەژن رەمەزان دانان، و لەناو ئەو پلانە، چەودیاریکردن نرخ کەرەستەیل جەژنە.
غەفور وتیش: ئەوەسا گەردین شەوانە و رووژانە لە بازاڕەیل و ناوەندەیل بازرگانی کەیمن، تا چەومان وە نرخ چشتەیل بوود، هەرچەن لە رووژەیل گوزەشتە بەرزەو بوی، ئەوەیش لەوەر چەن هوکاریگ، گرنگترینیان بانوخوارکردن نرخ دۆلار و بەرزەوبوین نرخ چەن چشتیگ لە سەرچەوەگەی، وەلێ لە رووژەیل دویایین مانگ رەمەزان بەشیگیان ئەرزانەو بوی.
لە کۆتایی وتیش: نرخ فرەی ئەو چشتەیلە ک لە ماوەی دویایین بەرزەو بوی، دویای چەن رووژ فرە کەمیگ داوەزێد.
