هەواڵی کوردستان ئێستا

شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، وەگەرد باربارا لیف خانمە یاوەر وەزیر دەرەوەی ئەمریکا، لە هەولێر گردەو بوی.

لەو گردەوبوینە ک باڵیۆز ئەمریکا لە عراق و قونسوڵ گشتی ئەمریکا لەلای هەرێم کوردستان ئامادەی بوی، باس پەیوەندیەیل ئەمریکا وەگەرد عراق و هەرێم کوردستان کریا، و شیوەیل هاوکاری هاوبەش و رەوش سیاسی و ئابووری لە عراق و ناو هەرێم کوردستان و پەیوەندیەیل هەولێر و بەغدا.

وەگورەی بەیاننامەیگ لە نویسینگەی بارزانی، هەردوگ لایەنەگە دووپات لە پابەندی وە یادداشت لەیەکڕەسینەوەی ناوبەین وەزارەت پیشمەرگە و وەزارەت دەیشت ئەمریکا لە باوەت چاکسازی لەناو وەزارەت پیشمەرگە و وەیەککردن هیزەیلی، و هەمیش هاوڕا بوین لەبان یەکڕزی گشت لایەنەیل کوردستانی، و چارەکردن گرفتەیل ناوخوەیی لە هەرێم کوردستان، و هاوکاری ئیسە ناوبەین حکومەت هەرێم کوردستان و حکومەت فیدڕاڵی وە کاریگ ئەرێنی زانستن.

 فراوانکردن هاوکاری هاوبەش ناوبەین ئەمریکا و عراق و هەرێم کوردستان باوەتەیل ناو ئەو دیدارە بوین کەلوتاوی باس دەرفەتەیل قایمکردن ئابووری لە عراق و هەرێم کوردستان و هەبوین زەمینەی گونجیاگ ئەرا کەرت تایبەت و بەرهەمهاوردن ئەمریکی.

دویاترین نووەوبویەیل جەنگ دژوە داعش و رەوشەیل ناوچەگە وەشیوەی گشتی و چەن باوەتیگ خاوەن گرنگی هاوبەش لەناو ئەو دیدارە بوین.