هەواڵی کوردستان ئێستا

شەفەق نیوز/ خانمە مامووستایگ لە یەکیگ لە مەکتەوەیل شار هەولێر پایتەخت هەرێم کوردستان، ئمڕوو سێشەممە، وت: دووان لە خانمە مامووستایل هاوڕیی دەس فرەیگ لەلی وەشاننە، ک زەخمدار بویە، وتیش: ئەوەیش لەبان ئەوە بوی ک رازی نەویمە پرسیارەیل تاقیکردن ئەرایان ئاشکرا بکەم.

مەریەم حەسەن لە مەکتەو "رۆشن" لەناو کۆنگرەیگ رووژنامەوانی وت: دوو خانمە مامووستا وە پارچە ئاسنگ دەس لەلی وەشاننە، و دانەسەی وەر شەق، و هەڕەشەی کوشتنی دانە.

لە هووکارەیل ئەو دەسدرویژیە، مەریەم خان دیاری کرد ک ئامادە نەوین پرسیارەیل تاقیکردن وەو دوو خانمە مامووستا بیەم تا کوڕەیلیان پلەیگ بەرزتر بارن، وتیش؛ لەوەر ئەو دەسوەشاننە، خوین لە پەنجەی هاتیە و چەودیاریکردن پزشکی خوازێد.

 وتیش؛ چەن جاریگ داوا کردیە بخەنەی مەکتەویگتر، باوجی داوای جیوەجی نەکریاگە، دووپات کرد ک کەفێدە وەر رەفتار بەدیگ و جەنگ دەروینی لەناو مەکتەوەگە، لەوەر هەڵوێست رکداری لە رەفتارکردن وەرد پلە و پرسیارەیل تاقیکردن، و روینەیان وە کوڕەیل مامووستایل ناو مەکتەوەگە.

هەرلیوا، ئاڵان حەمە سەعید وەزیر پەروەردە لە هەرێم کوردستان، لە وتاریگ رووژنامەوانی وت: ئەرکدار وەڕیەوبەر گشتی پەروەردەی هەولێر و خانمە وەڕیەوبەر مەکتەوەگە کردگە تا دەسەی لێکۆڵینەوە لەو رویداوە دروس بکەن.