هەواڵی کوردستان ئێستا

دیجیتاڵ میدیتی سپێده‌

رووبەروبونەوەی سوپای ئیسرائیلی و كەتیبە فەڵەستینییەكان تا دێت چڕتر دەبێتەوە و ژمارەی گیانلەدەستدانەكان لە كەرتی غەززە بۆ 28 كەس بەرزبووەتەوە و لە ئیسرائیلیش چەند كەسێك كوژراون.

وەزارەتی تەندروستیی فەلەستین لە كەرتی غەززە رایگەیاند، لەئەنجامی بۆردومانی ئیسرائیل بۆ رۆژهەڵاتی شاری غەززە، دوو هاووڵاتیی فەلەستینی شەهید بوون و دووانی دیكەش برینداربوون.بەمجۆرە ژمارەی قوربانییە فەلەستیینیەكان لە سەرەتای دەستپێكردنی هێرشەكانی قەوارەی زایۆنیستییەوە بۆ 28 شەهید و نزیكەی 90 بریندار بەرزبووەوە كە لە نێویاندا ژن و منداڵ بوونیان هەیە.سوپای ئیسرائیلیش دەڵێت، لە هێرشەكانیاندا 25 چالاكوانیان لە بزوتنەوەی جیهادی ئیسلامی لە كەناری خۆرئاوا دەستگیر كردووە.

هاوكات لە دوێنێوە كەتیبە چەكدارەكانی فەلەستین دەستیان بە وەڵامدانەوەی هێرشەكانی ئیسرائیل كردووە كە تیایدا چەند فەرماندەیەكی سەربازیی فەلەستینی شەهید كراون.

بە وتەی راگەیاندنە ئیسرائیلییەكان، بەهۆی هێرشی كەتیبە چەكدارەكانی غەززەوە بۆ سەر ناوچەكانی ئیسرائیل، كەسێك كوژراوە و شەشی دیكەش بریندار بوون.سووپای قەوارەی ئیسرائیلیش ڕایگەیاند: 507 مووشەك لە كەرتی غەززەوە ئاراستەی ئیسرائیل كراون، 368 دانەیان توانیویەتی بگاتە سنوورەكانی قەوارەكە. هاوكات ئاشكراشی كردووە لەسەرەتای هێرشەكانیانەوە لە سەرلەبەیانیی سێشەممەوە 147 ئامانجیان لە غەززە پێكاوە.