هەواڵی کوردستان ئێستا

شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، چەوی کەفتە نەسیر محمدۆف جیوەجیکەر کارەیل باڵیۆزخانەی کۆمار ئازەربایجان لە عراق، و رای خوەیان لە خاسەوکردن پەیوەندیەیل ناوبەین عراق و هەرێم کوردستان وەگەرد ئازەربایجان نشان دان.

سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: هەردوگ لایەنەگە ڕێک کەفتن ک دەرفەتەیل خاسیگ هەس ئەرا خاسەوکردن پەیوەندیەیل، وەتایبەت لە چین ئابووری و بازرگانی و گەشتوگوزاری.

لەی باوەتە باس دەسکردن وە وازکردن قونسوڵخانەی ئازەربایجان لە هەرێم کوردستان کریا، ک ریکارەیلیگ وەرجە گردەوبوین سەرۆک هەرێم کوردستان و سەرۆک ئازەربایجان لە میونخ ئەرای کریاگە.

بەیاننامەگە وتیش: سەردان چەوەڕیکریاگ سەرۆک هەرێم کوردستان ئەرا باکو وە مکیسیگ فەرمی وەلایەن سەرۆک ئازەربایجان، و رەوش گشتی، و بڕیگ باوەت خاوەن گرنگی لەلای هەردوگ لایەنەگە لەو دیدارە باس کریا.